Kina ka vendosur ta shtyjë me dy muaj pezullimin e tarifës shtesë prej 24% që zbatohet për mallrat me origjinë nga Shtetet e Bashkuara, duke e zgjatur kështu afatin e armëpushimit tregtar mes dy ekonomive më të mëdha të botës deri në janar 2027. Vendimi hyn në fuqi më 10 nëntor. Megjithatë, tarifa aktuale prej 10% për importet amerikane do të vijojë të aplikohet, sipas Bloomberg.
Masa edhe për portet dhe mineralet kritike
Përveç tarifës shtesë, Pekini bëri të ditur se deri më 10 janar 2027 do të mbetet i pezulluar edhe zbatimi i tarifave të posaçme portuale për anijet që kanë lidhje me SHBA-në. Po deri në këtë datë shtyhen edhe disa kufizime mbi eksportin e mineraleve kritike dhe të teknologjive që lidhen me to.
Këto vendime vijnë pas marrëveshjes së arritur në shtator në Uashington mes Presidentit amerikan, Donald Trump, dhe homologut të tij kinez, Xi Jinping, për ta mbajtur në fuqi armëpushimin tregtar.
Nga Busani te paketa 60 miliardë dollarëshe
Armëpushimi fillestar ishte dakordësuar në tetor 2025, kur dy udhëheqësit u takuan në Busan të Koresë së Jugut. Atëherë palët ranë dakord të pezullonin tarifat shtesë prej 24%, por të ruanin tarifat prej 10%.
Pas takimit të shtatorit, Uashingtoni dhe Pekini hodhën në tryezë një paketë uljesh reciproke tarifore me vlerë rreth 60 miliardë dollarë. Kjo paketë, ende e pafinalizuar, përfshin produkte bujqësore amerikane me vlerë rreth 17 miliardë dollarë, e llogaritur mbi bazën e importeve kineze të vitit 2024.
Vëmendje ndaj Seksionit 301
Autoritetet kineze deklaruan se do të vazhdojnë të monitorojnë planet e administratës amerikane për zëvendësimin e disa tarifave, të cilat gjykatat i kanë shpallur të pavlefshme, me masa të reja sipas Seksionit 301 të legjislacionit tregtar të SHBA-së.
Trump dhe Xi pritet të takohen përsëri javën e ardhshme, gjatë samitit të APEC që do të zhvillohet në Kinë.