Bashkimi Evropian ka siguruar marrëveshjen për buxhetin e vitit 2027, me një vlerë totale prej 199.7 miliardë eurosh. Në një deklaratë të përbashkët, vendet anëtare theksojnë se dakordësia i lejon bllokut prej 27 shtetesh të vijojë zbatimin e politikave dhe programeve të miratuara më parë.

Sipas deklaratës, buxheti synon gjithashtu të ruajë kapacitetin e BE-së për të reaguar ndaj krizave dhe sfidave që vazhdojnë, si situata në Ukrainë dhe në Lindjen e Mesme, por edhe ndaj zhvillimeve të paparashikuara.

Rritje e lehtë krahasuar me 2026

Shuma e dakorduar për vitin e ardhshëm është pak më e lartë se buxheti i vitit 2026, i cili ishte rreth 190 miliardë euro. Marrëveshja pritet ende të miratohet zyrtarisht nga shtetet anëtare dhe Parlamenti Evropian, hapa që konsiderohen formalitete.

Dakordësia mbështetet në propozimin e Komisionit Evropian, i cili kishte kërkuar 199.9 miliardë euro për vitin 2027. Ndër prioritetet kryesore të Komisionit ishin konkurrueshmëria ekonomike, siguria, mbrojtja dhe mbështetja për Ukrainën.

Fundi i ciklit shumëvjeçar

Buxheti i BE-së ndërtohet mbi bazën e një kornize financiare 7-vjeçare, nga e cila dalin buxhetet vjetore. Për periudhën 2021–2027, korniza aktuale parashikon gjithsej rreth 1.1 trilion euro. Duke qenë se viti 2027 mbyll këtë cikël, në Bruksel janë duke u zhvilluar negociata të vështira për kornizën e ardhshme.

Fondet e BE-së vijnë kryesisht nga kontributet e shteteve anëtare, ndonëse buxheti evropian mbetet shumë më i vogël se shpenzimet e përgjithshme të buxheteve kombëtare. Gjermania, kontribuesja më e madhe neto, mbulon pothuajse një të katërtën e fondeve të BE-së, por në të njëjtën kohë përfiton ndjeshëm nga tregu i përbashkët evropian.

Përplasje për periudhën 2028–2034

Bisedimet për buxhetin e ri shumëvjeçar 2028–2034 vazhdojnë. Vendet anëtare synojnë një marrëveshje deri në fund të vitit, por ky objektiv shihet si shumë ambicioz për shkak të dallimeve të mëdha në qëndrimet e tyre.

Aktualisht në tryezë ndodhet një propozim prej 1.826 trilionë eurosh për shtatë vitet e ardhshme. Kancelari gjerman Friedrich Merz është ndër udhëheqësit që e kundërshtojnë, duke e quajtur të papranueshëm dhe duke kërkuar shkurtime prej disa qindra miliardë eurosh.