Këshilli i Ministrave miratoi të enjten projektligjin e ri për donacionet dhe sponsorizimet, i cili u jep sponsorizuesve mundësinë të zbresin nga tatimi mbi fitimin deri në 30% të shumës së sponsorizuar. Llogaritja bëhet mbi bazën e tatimit mbi fitimin të vitit paraardhës fiskal.
Propozimi mban firmën e Taulant Ballës dhe Erion Braçes.
Sponsorizimet në natyrë
Kur sponsorizimi jepet në natyrë, zbritja do të jetë deri në 30% e tatimit mbi fitimin që duhet paguar, në përputhje me rezultatin financiar të vitit pasardhës.
Përfituesit nuk tatohen
Sipas amendamenteve, të ardhurat që përfituesi merr nga sponsorizimi nuk do të tatohen dhe nuk do të ndikojnë në klasifikimin e tij sipas shkallëve tatimore.
Kushtet dhe e drejta e ankimit
Për të përfituar lehtësitë, sponsorizuesit duhet të kenë hartuar, depozituar dhe miratuar pasqyrat financiare të vitit paraardhës. Kriteret e zbatimit do të përcaktohen me vendim të Këshillit të Ministrave.
Projekt-amendamentet u njohin sponsorizuesve edhe të drejtën të ankimojnë pranë Drejtorisë së Përgjithshme të Tatimeve refuzimin e lehtësive tatimore, brenda 30 ditëve nga komunikimi i vendimit.
