Rreth 85% e bizneseve shqiptare konsiderohen të papërgatitura për procesin e integrimit europian, ndërsa produktiviteti i ekonomisë mbetet i ulët dhe industria përpunuese ka një peshë të kufizuar, sipas deputetes së Partisë Demokratike, Jorida Tabaku.
Në një reagim publik, Tabaku ngriti shqetësimin se bizneset nuk janë përfshirë në mënyrë të mjaftueshme në procesin e negociatave me Bashkimin Europian, ndonëse një pjesë e detyrimeve dhe kostove të anëtarësimit do të prekin drejtpërdrejt sipërmarrjen.
Sipas saj, integrimi europian është një proces pozitiv, por kërkon përgatitje të hershme dhe një konsultim më të gjerë me sektorin privat.
Tabaku iu referua edhe vlerësimeve të Institutit të Vjenës, sipas të cilave Shqipëria mbetet 40–50% nën nivelin që kishte Bullgaria në momentin e anëtarësimit në Bashkimin Europian.
Ajo theksoi se produktiviteti ka mbetur në nivele të ulëta, ndërsa industria përpunuese përbën vetëm rreth 6% të ekonomisë, tregues që, sipas saj, dëshmojnë mungesën e një transformimi të plotë strukturor të ekonomisë.
Në reagimin e saj, Tabaku u ndal edhe te programi i paralajmëruar për trajnimin e më shumë se 48 mijë bizneseve, duke nisur nga tetori. Sipas saj, sfida kryesore mbetet koha e kufizuar për përgatitjen e sipërmarrjeve për kërkesat e tregut të përbashkët europian.
Ajo ngriti gjithashtu shqetësimin për diferencën mes nivelit të çmimeve dhe të ardhurave në Shqipëri. Sipas Tabakut, familjet shqiptare përballen me paga të ulëta, çmime të larta të ushqimeve dhe kosto të larta të banesave.
Në Tiranë, sipas shifrës së cituar prej saj, një familjeje mund t’i duhen rreth 22 vite të ardhura për të blerë një apartament.
Tabaku vlerësoi se përgatitja për integrimin europian duhet të përqendrohet te rritja e produktivitetit, forcimi i konkurrencës, zhvillimi i industrisë dhe informimi në kohë i bizneseve për standardet dhe kostot që lidhen me tregun europian.
Postimi ” Tabaku: Qeveria, pesë vjet vonesë për të përgatitur biznesin për integrimin në BE ” eshte marre nga Revista Monitor.
