Masa e ndërmarrë nga qeveria për reduktimin e TVSH-së për autobusët elektrikë që përdoren transportit publik, nuk ka funksionuar për të nxitur kompanitë private që të zëvendësojnë flotat e tyre ekzistuese të cilat operojnë me karburant. Sipas raportit të Fondit Monetar Ndërkombëtar, “norma e reduktuar e TVSH-së për autobusët elektrikë, nuk ka qenë e suksesshme dhe duhet të rishikohet e të zëvendësohet me tarifa neutrale të të ardhurave, në mënyrë që të mund të motivojnë përdorimin e më shumë automjeteve miqësore me mjedisin, duke zëvendësuar gradualisht flotën ekzistuese” .
Tarifa ta tilla janë një mjet alternativ që qeveritë mund të përdorin për të taksuar ndotësit dhe për të ofruar një zbritje taksash për ata që përdrorin mjete miqësore me mjedisin. Sipas FMN, të tilla politika inkurajojnë njerëzit të reduktojnë emetimet duke zgjedhur automjetet hibride në vend të atyre me lëndë djegëse.
Aplikimi i normës së reduktuar të TVSH-së 10 % për importin e autobusëve elektrikë të transportit publik u ndërmor nga qeveria në vitin 2019, si një politikë fiskale mjedisore që synote minimizimin e ndotjes së ambientit dhe nxitjen e kërkesës për import të këtyre mjeteve.
Vetëm në kryeqytet janë 11 linja urbane, të cilat kanë një flotë prej 311 mjetesh dhe deri më tani flota është zëvendësuar me 20 autobusë hibridë dhe elektrikë që i përkasin linjës së unazës, ndërsa në qytetet e tjera nuk ka pasur ndryshime në këtë drejtim. Sipas FMN transporti në Shqipëri, ze 15 për qind të emetimeve të gazrave në ambient.
Sipas të dhënave të Drejtorisë së Përgjithshme të Transportit Rrugor, përgjatë këtij viti, deri në muajin Nëntor janë importuar në total 609 mjete elektrike, nga të cilat 561 autovetura, 27 motorra dhe 11 automjte për transport të përzier.
Elisabeta Dosku/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
