29.5 C
Tirana
E enjte, 13 Qershor 2024

Tregtia e jashtme gjatë korrikut, eksportet tkurren për të pestin muaj me radhë, bien edhe importet

Duhen Lexuar

Kompanitë shqiptare shitën 1.8 miliardë lekë më pak mallra ne tregjet e huaja në muajin e kaluar se krahasuar me korrikun e një viti më parë. Nëse në të njëjtin muaj të 2022-shit ata eksportuan gati 40 miliardë lekë, korrikun e këtij viti vlera e produkteve shqiptare të shitura në tregjet ndërkombëtare ra në më pak se 38 miliardë. Zhvlerësimi i Euros sipas ekspertëve është një prej arsyeve kryesore për tkurrjen prej 4 për qind.

“Efekti i parë që ne na vjen në mendje është ai i kursit të këmbimit. Dihet që detyrimisht eksportet janë në euro dhe rënia e saj reflektohet te vlera”, thotë eksperti për ekonominë Selim Blliku.

Rënia më e fortë është shënuar tek eksportet e materialeve të ndërtimit apo metalet, ndjekur nga veshjet e këpucët si dhe prodhimet e drurit dhe letrës. Ndërkohë muajin e  shkuar u zgjeruan eksportet e mineraleve apo lëndëve djegëse si dhe produkteve bujqësore vendase.  

“Në kohën që mallrat e importit janë më të lira, është e sigurt që produktet shqiptare do të humbasin konkurrueshmërinë në tregjet e huaja”, shprehet eksperti.

Të dhënat nga Instituti i Statistikave tregojnë se muajin e shkuar, me gjithë flukset e shtuara të turistëve u blenë 11.1 miliardë lekë më pak mallra nga jashtë se krahasua me korrikun e një viti më parë.

“Jemi në periudhë inflacioniste. Njerëzit janë përqendruar vetëm te shporta bazë. Dalja e prodhimit vendas duket se ka pasur ndikimin e vet te rënia e importeve”, shton ai.

Të dhënat nga INSTAT tregojnë se në harkun e muajve janar-korrik, eksportet e mallrave shqiptare janë tkurrur me rreth 20 miliardë lekë apo mbi 191 milionë euro. Ndërkohë në harkun e 7 muajve janë blerë nga jashtë 18,4 miliardë lekë me kursin e tanishëm të këmbimit, që do të thotë rreth 175 milionë euro më pak mallra.

Burimi: A2 CNN

- Reklama -
spot_img
- Reklama -

Artikujt e Fundit

WallStreet.al Deshirojme tju informojme per cdo artikull te ri qe publikojme ne web.
Dismiss
Allow Notifications