Ky është bërë udhëtimi më i lakmuar dhe më i bukur me tren në të gjithë Turqinë, pasi ofron ndalesa të shumta në pjesët më të bukura të lindjes së vendit.
Treni niset nga kryeqyteti i vendit, Ankaraja dhe udhëton mbi 1,300 kilometra për në Kars, një qytet historik në verilindje, në kufirin me Armeninë dhe Gjeorgjinë.
Megjithëse ka edhe një një tren alternativ që e bën këtë itinerar për 20 orë, eksperienca në Turistik Doğu Ekspresi e cila zgjat 32 orë ju bën ta shijoni plotësisht udhëtimin.
Përgjigjja e Turqisë për Trans-Siberianin
Ky tren u projektua për të shijuar të gjithë udhëtimin, me shumë ndalesa nëpër disa provinca spektakolare, por të vështira për t’u aksesuar, të tilla si Kayseri, Sivas, Erzincan dhe Erzurum.
Sipas drejtorit të Hekurudhave Shtetërore Turke, Hasan Pezuk, linja Ankara-Kars konsiderohet një nga katër linjat më të bukura në botë të trenave.
Për çdo ndalesë gjatë rrugës, pasagjerët kanë deri në tre orë kohë për të eksploruar zonën, përpara se të hipin sërish në tren për të vazhduar udhëtimin.
Turistik Doğu Ekspresi u hap për herë të parë në vitin 2019, por për shkak të pezullimit të shërbimit si rrjedhojë e pandemisë, ai vazhdon të jetë relativisht i ri. Pavarësisht çmimit paksa të lartë, popullariteti i këtij udhëtimi po rritet gjithnjë e më shumë, duke e bërë të vështirë gjetjen e një bilete.
“Është vërtet një moment shumë i veçantë për mua dhe familjen time”, thotë Zulan-Nour Komurcu, 26 vjeçe, e cila po feston ditëlindjen me familjen në bordin e këtij treni. “Kjo është dhurata që mora për ditëlindje.”
Në ambientin e ngrënies, njerëzit mund të festojnë gjatë gjithë natës në një atmosferë të ngjashme me një klub nate. Nëse doni të qëndroni në kabinën tuaj, aty do të keni një frigorifer nga ku mund të merrni pijet e preferuara.
