Tripadvisor thotë se vendi që në shekullin XX ishte thjesht një fshat që njihej për peshkim, është shndërruar tashmë, në shekullin XXI, në një destinacion të preferuar në botë për udhëtime të klasit të lartë, duke u bërë destinacioni më i famshëm në botë për vitin 2022.
Platforma e udhëtimit sapo ka publikuar Çmimet e Përzgjedhura nga Udhëtarët për vitin 2022: destinacionet më të mira mes më të mirave. (Travelers’ Choice Awards for 2022: The Best of the Best Destinations).
Ndërsa Dubai ultramodern zë vendin e parë, ai nuk është i vetmi destinacion nga Lindja e Mesme. Lista e këtij viti varion nga qytetet më të njohura europiane, deri te destinacionet e lakmuara tropikale dhe në shkretëtira.
10 destinacionet më të famshme në botë
Këto janë vendet më të vlerësuara dhe më të pëlqyera të Tripadvisor për vitin 2022:
- Dubai, Emiratet e Bashkuara Arabe
- Londër, Mbretëria e Bashkuar
- Kankun, Meksikë
- Bali, Indonezi
- Kretë, Greqi
- Romë, Itali
- Cabo San Lucas, Meksikë
- Stamboll, Turqi
- Paris, Francë
- Hurghada, Egjipt
Pse Dubai?
“Si një vend që gjithmonë është i famshëm, Dubai është rritur gradualisht në renditjet e Çmimeve të Përzgjedhura nga Udhëtarët në Tripadvisor gjatë viteve të fundit, derisa tani në vitin 2022 ka arritur të rrëmbejë kurorën e destinacionit të parë më të famshëm në botë”, tha Justin Reid, drejtor i medias i destinacioneve dhe udhëtimeve në Tripadvisor.
“Dubai është një qytet ultramodern që ka gjithҫka: plazhe të arta, kuzhinë të klasit botëror dhe hotele të mrekullueshme. Meqenëse Çmimet e Përzgjedhura nga Udhëtarët bazohen te vlerësimet për vendet që duhen vizituar dhe për gjërat që duhen bërë në ato destinacione, vendi që renditet si më i miri në botë do të thotë se ka marrë vlerësime të shkëlqyera nga udhëtarët në të gjithë sektorët e tij të turizmit”, tha Reid.
“Pavarësisht efekteve të pandemisë, Dubai ende tërhoqi vizitorë gjatë vitit të kaluar dhe ka spikatur si vendi i tyre i preferuar, në një vit kur të gjithë kishin vërtet nevojë për pak emocione”, tha ai.
Për njerëzit që duan të vizitojnë Dubain këtë vit, rregullat e hyrjes në këtë vend mund të jenë paksa të komplikuara dhe variojnë për vende të ndryshme.
Emiratet e Bashkuara Arabe, pjesë e të cilave është edhe Dubai, kanë hapur aplikime për viza turistike për udhëtarët e vaksinuar nga të gjitha vendet, përveçse për disa shtete afrikane.
Pasagjerët që mbërrijnë në Dubai nga shumica e vendeve duhet të paraqesin një test negativ PCR të bërë 72 orët e fundit përpara mbërritjes së tyre, por kjo kohëzgjatje është reduktuar në 48 orë për një listë të caktuar shtetesh.
10 destinacionet më në trend në botë
Kategoria e destinacioneve më në trend lidhet me destinacionet që patën rritjen më të madhe nga njëri vit në tjetrin të komenteve pozitive të udhëtarëve nga Tripadvisor dhe të vlerësimeve për hotelet, restorantet dhe gjërat që mund të bëhen aty. Këto janë 10 destinacionet më në trend:
- Majorka, Spanjë
- Kajro, Egjipt
- Rodos, Greqi
- Tulum, Meksikë
- Dubrovnik, Kroaci
- Ibiza, Spanjë
- Natal, Brazil
- Arusha, Tanzani
- Göreme, Turqi
- Santorini, Greqi
Rajoni i Mesdheut doli mjaft mirë në këtë kategori me shtatë destinacione në listë, ku dominojnë destinacionet me shumë diell.
Top 10 destinacionet më të famshme në Shtetet e Bashkuara
Qyteti i preferuar i lojërave të fatit në Amerikë kryeson listën e SHBA-së për vitin 2022, ndërsa destinacionet me mot të ngrohtë janë padyshim një atraksion i madh për përdoruesit e Tripadvisor:
- Las Vegas, Nevada
- Oahu, Hauai
- Maui, Hauai
- Key West, Florida
- New York City, Nju Jork
- New Orleans, Luiziana
- Savannah, Gjeorgji
- Miami Beach, Florida
- Nashville, Tenesi
- Sedona, Arizona
Ndërkohë, ishulli i Hauait, më i madhi në shtetin e Hauait, është destinacioni më në trend në Shtetet e Bashkuara për vitin 2022.
Kategoritë e tjera
Së bashku me disa kategori më të përgjithshme, Tripadvisor gjithashtu rendit edhe destinacionet e preferuara sipas kategorive specifike.
- Dashamirësit e ushqimit: Romë, Itali
- Të pasionuarit pas natyrës: Parku Kombëtar i vullkanit Arenal, Kosta Rika
- Destinacioni për ski: Zermatt, Zvicër
- Dashamirësit e qyteteve: Dubai
Për ata që preferojnë diellin: Kankun
