Një valë protestash po përfshin disa nga kryeqytetet dhe qytetet më të vizituara të Europës, nga Parisi, Roma dhe Madridi te Brukseli e Tirana. Qytetarët kanë dalë në rrugë kundër kostos së lartë të jetesës, krizës së strehimit dhe pakënaqësive politike, ndërsa në disa raste demonstratat janë shoqëruar me përplasje dhe dëme materiale. Situata po krijon pasiguri edhe për turistët që kanë planifikuar udhëtime drejt këtyre destinacioneve.

Edhe pse arsyet e protestave ndryshojnë nga një vend në tjetrin, kërkesat e protestuesve shpesh përkojnë. Në disa shtete tubimet mbeten paqësore, por në të tjera janë regjistruar përplasje të dhunshme me forcat e rendit. Për udhëtarët, kjo do të thotë më shumë vëmendje ndaj zhvillimeve lokale dhe gatishmëri për pengesa në qarkullim.

Franca

Që nga shtatori, nxënësit kanë bllokuar shkolla në shenjë proteste kundër mungesës së mësuesve dhe kushteve të dobëta. Të shtunën, lëvizjes iu bashkuan sindikatat dhe Jelekët e Verdhë, me kërkesa kundër shtrenjtimit të jetesës. Në Paris, Lion dhe Marsejë u raportuan grabitje dhe zjarrvënie, ndërsa në Limoges u dogj një pjesë e madhe e ndërtesës së bashkisë. Presidenti Emmanuel Macron bëri thirrje për qetësi dhe kërkoi përgjegjësi për dëmet e shkaktuara. Kryeministri Sébastien Lecornu njoftoi kufizime lokale të qarkullimit gjatë natës.

Spanja

Në Spanjë, pakënaqësia lidhet kryesisht me qiratë e larta dhe mungesën e banesave të përballueshme. Shkëndija që ndezi protestat ishte dëbimi nga banesa i 87-vjeçares Maricarmen Abascal në Madrid, ku kishte jetuar për mbi 70 vjet. Ajo ndërroi jetë në spital në fillim të tetorit. Qindra mijëra njerëz protestuan në më shumë se 50 qytete. Dy dekrete për strehimin nuk arritën të miratoheshin në parlament, ndërsa kryeministri Pedro Sánchez njoftoi zgjedhje të parakohshme më 29 nëntor.

Portugalia

Mijëra qytetarë portugezë marshuan të shtunën, duke kërkuar paga dhe pensione më të larta, shërbime publike më cilësore dhe strehim të përballueshëm. Në Lisbonë protestuesit ngritën një kamp me çadra në sheshin Rossio, ndërsa në Porto policia kishte shpërndarë me forcë një kamp të ngjashëm. Ministri i Brendshëm, Luís Neves, e mbrojti ndërhyrjen duke e cilësuar të ligjshme.

Italia

Në Itali, studentët dhe sindikatat kanë dalë kundër pagave të ulëta dhe kostos së jetesës. Ata kërkojnë ulje taksash dhe më shumë fonde për arsimin dhe shërbimet sociale, në vend të rritjes së shpenzimeve ushtarake. Në Milano, Torino dhe Bolonja pati përplasje me policinë, e cila përdori gaz lotsjellës dhe ujë me presion. Kryeministrja Giorgia Meloni e dënoi dhunën.

Shqipëria

Në Shqipëri, protestat kundër qeverisë lidhen me korrupsionin, mungesën e vendeve të punës dhe problemet në arsim. Si faktor nxitës përmendet projekti i diskutueshëm për një resort luksoz në bregdet, në të cilin është i përfshirë Jared Kushner, dhëndri i presidentit amerikan Donald Trump. Kritikët kërkojnë transparencë dhe shprehin shqetësim për zonat natyrore të mbrojtura. Në Tiranë, ku protestave u janë bashkuar edhe studentë, raportohen zjarrvënie dhe sulme ndaj ndërtesave dhe bizneseve. Policia përdori gaz lotsjellës dhe ujë me presion. Kryeministri Rama ua atribuoi trazirat “forcave të huaja” dhe refuzoi të japë dorëheqjen.

Belgjika

Në Bruksel dhe Liezh, protestuesit u mblodhën kundër kostos së jetesës, masave të kursimit dhe reformave që mund t'i bëjnë më të vështira studimet universitare. Në Bruksel u hodhën shishe dhe fishekzjarrë, duke çuar në ndërhyrjen e policisë. Ministri i Brendshëm, Bernard Quintin, premtoi masa për rikthimin e rendit.

Çfarë i bashkon protestat

Strehimi, pagat dhe arsimi dalin si shqetësime të përbashkëta në të gjitha këto vende. Ngjarjet në Francë duket se po frymëzojnë veprime edhe në vende të tjera: nxënës kanë bllokuar shkolla në Berlin dhe Hamburg, ndërsa në Dublin është protestuar për koston e jetesës dhe tarifat universitare. Megjithatë, është ende herët për të folur për një lëvizje të organizuar në shkallë europiane.

Këshilla për udhëtarët

Kush ka planifikuar udhëtime drejt qyteteve ku zhvillohen protesta, këshillohet të ndjekë informacionet e përditësuara nga autoritetet lokale dhe operatorët e transportit. Demonstratat mund të sjellin bllokime rrugësh, ndërprerje të transportit publik dhe vonesa në lëvizjen drejt aeroporteve apo atraksioneve turistike.

  • Kontrolloni paraprakisht oraret e fluturimeve dhe trenave.
  • Parashikoni më shumë kohë për zhvendosjet brenda qytetit.
  • Shmangni zonat ku mbahen tubime, veçanërisht kur ka rrezik përplasjesh me policinë.
  • Nëse rezervimet nuk janë finalizuar, zgjidhni opsione fleksibël për akomodimin dhe transportin, për të shmangur kosto shtesë në rast ndryshimi planesh.