Greva kombëtare që u zhvillua në Itali më 30 tetor mund t'i ketë shkaktuar ekonomisë së vendit një dëm prej rreth 1 miliard eurosh. Zyra e studimeve e Cgia di Mestre llogarit se vetëm ndërprerja e punës ka sjellë humbje deri në 817 milionë euro, ndërsa nëse merren parasysh edhe kostot indirekte, shuma totale i afrohet 1 miliard eurove.
Protesta u thirr nga disa sindikata të pavarura, të cilat kundërshtojnë rritjen e kostos së jetesës dhe shtimin e shpenzimeve për armatime. Vlerësimet bazohen në supozimin se në grevë ka marrë pjesë rreth 20% e punonjësve, pasi shifra zyrtare e pjesëmarrjes nuk ishte konfirmuar ende.
Rajonet industriale më të goditurat
Sipas Cgia-s, humbjet më të mëdha përqendrohen në zonat me nivelin më të lartë të industrializimit:
- Lombardia: 193.6 milionë euro
- Lacio: 94.3 milionë euro
- Veneto: 75.3 milionë euro
- Emilia-Romanja: 74.6 milionë euro
- Piemonte: 60.2 milionë euro
Pasoja përtej orëve të humbura
Efekti ekonomik shkon më tej se orët e papunuara. Ndërprerjet në transport, vonesat në zinxhirin e furnizimit dhe rënia e produktivitetit mund të rëndojnë mbi bizneset, shërbimet publike dhe financat e shtetit, duke prekur edhe të ardhurat nga taksat dhe kontributet.
Grevat mund të çojnë gjithashtu në shtyrjen e vizitave mjekësore dhe zgjatjen e listave të pritjes, ndërkohë që bllokimet në transportin hekurudhor të mallrave dhe në porte vonojnë dërgesat. Edhe familjet ndjejnë pasojat, pasi prindërit shpesh detyrohen të marrin leje nga puna për t'u kujdesur për fëmijët kur shkollat nuk punojnë normalisht.
Cgia nënvizon se këto shifra duhen lexuar me kujdes dhe se ato nuk përbëjnë gjykim mbi të drejtën e punonjësve për të protestuar. Një pjesë e kostos e mbajnë vetë grevistët, të cilëve zakonisht u zbritet paga për ditën e papunuar.
