Rreth 500 punonjës të bujqësisë dhe përfaqësues sindikalë nga disa vende evropiane u mblodhën të martën në Bruksel në një protestë që synonte të tërhiqte vëmendjen e Bashkimit Evropian ndaj vështirësive të sektorit. Protestuesit kërkuan mbështetje më të madhe nga institucionet europiane, duke kundërshtuar rritjen e kostove të prodhimit, pasigurinë në vendin e punës dhe të ardhurat e pakta.
Një nga kërkesat kryesore ishte që këto probleme të reflektohen në reformën e Politikës së Përbashkët Bujqësore, instrumentit kryesor përmes të cilit BE financon sektorin.
Plehrat kimike me çmim të dyfishuar
Shpenzimet e fermerëve janë rritur ndjeshëm si pasojë e konflikteve gjeopolitike dhe shtrenjtimit të energjisë, karburanteve dhe lëndëve të para. Përfaqësuesit e sektorit theksojnë se çmimet e plehrave kimike janë dyfishuar. Kombinimi i kostove të larta me çmimet e ulëta të shitjes po e vështirëson gjithnjë e më shumë vazhdimin e aktivitetit bujqësor.
12 milionë punonjës në sektor
Protesta u organizua nga Federata Evropiane e Sindikatave të Ushqimit, Bujqësisë dhe Turizmit, e cila nënvizoi se kriza nuk godet vetëm fermerët, por edhe miliona punonjës të sektorit. Në Evropë llogariten rreth 12 milionë punonjës në bujqësi, një pjesë e madhe e të cilëve punojnë në mënyrë sezonale ose të përkohshme, me paga të ulëta dhe siguri të kufizuar në punësim.
Sindikatat kërkojnë një përdorim më efikas të fondeve publike të BE-së, me qëllim mbështetjen e prodhimit bujqësor dhe garantimin e të drejtave themelore të punonjësve. Sipas tyre, rritja e kostove duhet të shoqërohet me masa konkrete për mbrojtjen e të ardhurave në sektor.
Debati për fondet europiane
Nga ana tjetër, vendet evropiane po përballen me kufizime në financat publike dhe me nevojën për të mbuluar shpenzime të tjera, përfshirë ndihmën për Ukrainën. Kjo ka ndezur debatin se si duhet të ndahen fondet e BE-së, ndërkohë që bujqësia vijon të përballet me presionin e shtrenjtimit të energjisë dhe plehrave kimike.
