Bashkimi Evropian po ndërmerr hapa konkretë për të zgjeruar bashkëpunimin me Vietnamin, me qëllim kryesor sigurimin e furnizimeve të qëndrueshme me minerale kritike dhe zvogëlimin e varësisë ekonomike nga Kina. Sipas dokumenteve të brendshme të institucioneve evropiane, Brukseli shpreh shqetësimin se burimet aktuale të lëndëve të para mund të përballen me ndërprerje, sidomos pas masave kufizuese që Pekini ka vendosur mbi eksportin e disa materialeve thelbësore. Vietnami dallohet për rezerva të mëdha të lëndëve të para strategjike, ku përfshihen tokat e rralla, tungsteni, antimoni, bismuti dhe boksiti. Këto elemente janë të domosdoshme për funksionimin e shumë sektorëve industrialë, duke përfshirë industrinë e mbrojtjes, prodhimin e eksplozivëve dhe të municioneve. Deri më tani, dërgesat vietnameze drejt tregut evropian janë mbështetur kryesisht te antimoni dhe tungsteni. Dokumentet e përgatitura nga delegacioni i BE-së në Hanoi nënvizojnë se kontisenti evropian nuk mund ta anashkalojë këtë vend si një burim alternativ furnizimi, në një periudhë kur shtetet e unionit synojnë të përforcojnë kapacitetet mbrojtëse dhe të minimizojnë rreziqet nga mbështetja te një numër i vogël partnerësh.
Për të arritur këto objektivë, planifikohet dhënia e mbështetjes financiare për sektorin vietnamez të nxjerrjes dhe përpunimit mineral. Iniciativat përfshijnë grante, kredi, ndihmë teknike dhe garanci për financimin e eksporteve. Këto masa synojnë zgjerimin e kapaciteteve vendase të përpunimit në Vietnam, duke krijuar një qasje të re dhe më të sigurt drejt lëndëve të para, larg monopolit të furnizimeve nga Kina. Këto tema pritet të shtrohen në tryezën e diskutimeve midis autoriteteve evropiane dhe udhëheqësit vietnamez To Lam, gjatë një vizite të mundshme të planifikuar për datën 22 tetor në Bruksel. Edhe pse kjo vizitë nuk ka qenë e konfirmuar zyrtarisht në momentin e raportimeve, Komisioni Evropian ka konfirmuar se po vlerëson hapësirat për bashkëpunim praktik në fushën e mineraleve kritike. Megjithatë, raportet tërheqin vëmendjen edhe ndaj disa sfidave dhe rreziqeve, duke përfshirë nivelin e ulët të transparencës mbi gjurmët e pranisë së Kinës në minierat vietnameze, barrierat rregullatore dhe politike, si dhe rivalitetin me shtete të tjera që synojnë të sigurojnë të njëjtat rezerva. Për Bashkimin Evropian, ky afrim me Vietnamin përbën një gur themeli në strategjinë e gjerë për diversifikimin e zinxhirit të furnizimit me lëndë të para, të cilat mbeten vitale për teknologjinë, industrinë dhe mbrojtjen, në një kohë kur konkurrenca globale për këto burime po intensifikohet ndjeshëm.
