Bashkimi Europian dhe Kina kanë arritur një mirëkuptim të përbashkët që pritet të reduktojë ndjeshëm eksportet e automjeteve kineze hibride drejt tregut europian. Ky zhvillim u bë i ditur nga komisioneri europian për Tregtinë, Maros Sefcovic, pas përfundimit të bisedimeve dyditore të zhvilluara në Pekin, të cilat kishin në fokus uljen e deficitit tregtar të bllokut.
Sipas zyrtarëve europianë, marrëveshja parashikon ngadalësimin e eksporteve kineze të makinave hibride dhe uljen e importeve me disa milionë automjete gjatë një afati katërvjeçar. Ky hap vjen pas tre muajsh diskutimesh intensive mes Sefcovic dhe autoriteteve kineze, në një kohë kur deficiti tregtar i BE-së me Kinën ka kaluar shifrën e 1 miliard eurove në ditë. Udhëheqësit e bllokut pritet të diskutojnë mbi këtë rezultat në samitin që do të mbahet të enjten e ardhshme në Bruksel.
Maros Sefcovic e cilësoi këtë zhvillim si një hap të parë vendimtar drejt rivendosjes së ekuilibrit tregtar, ndërsa shtoi se mbetet ende shumë punë për t'u bërë deri në finalizimin e një marrëveshjeje të plotë. Nga ana e tij, ministri kinez i Tregtisë, Ëang, u shpreh gjatë takimit se Kina nuk përbën shkakun e problemeve tregtare të BE-së, por është partnere në zgjidhjen e tyre.
Në tregjet financiare, aksionet e prodhuesve vendas të automjeteve reaguan pozitivisht me rritje pas njoftimit, pasi industria europiane po përballet me sfida të mëdha, përfshirë planet e Volkswagen për të shkurtuar 100,000 vende pune. Statistikat tregojnë se importet e makinave hibride në BE u rritën me 86% gjatë periudhës njëvjeçare deri në shtator, të shoqëruara me një rënie çmimesh prej 20%.
Gjatë vitit të kaluar, eksportet kineze drejt BE-së arritën në 560 miliardë dollarë, nga 517 miliardë dollarë që ishin në vitin 2024, me rritje të ndjeshme në tregje kyçe si Gjermania, Italia, Spanja dhe Polonia. Ndërkohë, eksportet e BE-së drejt Kinës regjistruan vlerën e 268 miliardë dollarëve përgjatë të njëjtës periudhë.
