Tarifat e BE-së mbi pakot e Shein dhe Temu mund të sjellin 6 miliardë euro në vit për buxhetin

Tarifat që Bashkimi Europian po vendos mbi pakot e lira të tregtisë elektronike, me shënjestër kryesore platformat kineze si Shein dhe Temu, mund të sjellin rreth 6 miliardë euro të ardhura në vit për buxhetin e bllokut gjatë periudhës 2028-2034. Ky vlerësim, që nuk ishte bërë publik më parë, del nga një dokument i Komisionit Europian i zbuluar të premten. Shifra tregon sa larg po shkon Europa në përpjekjen për të frenuar fluksin e importeve me vlerë të ulët, të cilat, sipas autoriteteve europiane, vijnë kryesisht nga Kina.

5.8 miliardë pako në një vit

Të dhënat e Komisionit Europian tregojnë se vitin e kaluar në territorin e BE-së hynë rreth 5.8 miliardë pako me vlerë nën 150 euro. Kjo përbën një rritje prej 26% krahasuar me vitin paraardhës. Sipas Komisionit, pjesa më e madhe e këtyre dërgesave kishin një vlerë të deklaruar më të ulët se vlera reale, me synimin për t'u shmangur detyrimeve doganore.

Për të adresuar këtë problem, BE-ja do të aplikojë një tarifë shtesë prej 2 eurosh për pakot me vlerë të ulët, duke nisur nga 1 nëntori. Masa vjen pas tarifës prej 3 eurosh që hyri në fuqi në fillim të korrikut, duke e rritur më tej koston për çdo artikull të veçantë që porositet nga jashtë bllokut.

Vlerësimi për të ardhurat e pritshme përfshin edhe një rënie të parashikuar të numrit të pakove me vlerë të ulët që hyjnë në BE, pasi Brukseli pret që shitësit t'u përshtaten rregullave të reja.

Një zëdhënës i Komisionit Europian refuzoi të komentonte shifrën e të ardhurave. Gjatë një takimi informues me gazetarët të premten, një zyrtar tjetër i Komisionit deklaroi se nuk është e mundur të parashikohet me siguri të plotë niveli i të ardhurave nga tregtia elektronike.

Reagimi i Parlamentit Europian

Dirk Gotink, eurodeputeti që udhëheq reformën doganore të BE-së në Parlamentin Europian, shpjegoi se tarifa e re prej 2 eurosh ka për qëllim të luftojë atë që ai e quajti një “model biznesi shumë toksik, të bazuar në importet e tregtisë elektronike me vlerë të ulët nga Kina, që nuk përmbushin standardet dhe rregullat në fuqi”.

“Të ardhurat e reja që do të gjenerohen na japin mundësinë dhe mjetet për të korrigjuar dekada të tëra nëninvestimi dhe për t’u siguruar autoriteteve doganore europiane burimet që u nevojiten për të mbrojtur në mënyrë efektive tregun tonë të përbashkët”, – tha Gotink.

Si do të ndahen të ardhurat

Sipas vlerësimit të Komisionit Europian, rreth 90% e tarifave të mbledhura do të shkojnë në buxhetin e përbashkët të BE-së, ndërsa 10% do të mbeten në arkat e shteteve anëtare. Megjithatë, kjo ndarje nuk është përfundimtare dhe mund të ndryshojë nëse vendet anëtare kërkojnë një pjesë më të madhe, në një kohë kur negociatat për buxhetin e periudhës 2028-2034 vazhdojnë ende. Aktualisht, shtetet anëtare mbajnë 25% të të ardhurave nga tarifat.

Presion mbi platformat kineze

Masat europiane ndjekin hapat e ngjashëm që Shtetet e Bashkuara ndërmorën vitin e kaluar, kur hoqën trajtimin pa detyrime doganore për porositë online, me argumentin e konkurrencës së pandershme dhe të produkteve të pasigurta.

PDD Holdings, kompania mëmë e Temu, deklaroi në gusht se tarifat do të kishin ndikim të konsiderueshëm në disa segmente të aktivitetit të saj, pa dhënë megjithatë një vlerësim në shifra. Temu ka nisur t'u ofrojë disa blerësve ulje çmimesh për të kompensuar tarifat, gjë që dëshmon presionin për të mos ua kaluar konsumatorëve rritjen e kostove. Këta konsumatorë janë mësuar të porosisin bizhuteri me vlerë 3 euro ose fustane me çmim 5 euro.

Për Shein, Europa është një treg kyç: rreth një e treta e të ardhurave të kompanisë realizohen në kontinent. Shitjet e saj në rajon kishin nisur të binin edhe para vendosjes së tarifave, pasi kompania kishte rritur çmimet dhe kishte shkurtuar shpenzimet për reklama. Shein, e cila është listuar së fundmi në bursë dhe po zgjeron hapësirat e magazinimit në Poloni, deklaroi se mbetet e fokusuar në ruajtjen e çmimeve “konkurruese”, si dhe në ofrimin e dërgesave më të shpejta dhe më të përshtatshme për klientët.

Edhe AliExpress, pjesë e gjigantit kinez Alibaba, ka nisur të përshtatet duke zgjeruar kapacitetet e magazinimit në tregjet lokale. Kompania paralajmëroi megjithatë se tarifat do të dëmtojnë familjet me të ardhura të ulëta në Europë dhe do të “përkeqësojnë krizën e kostos së jetesës”.

Ndërkohë, rivalja amerikane Amazon theksoi se 97% e produkteve që shet në BE përmbushen dhe dërgohen nga magazina brenda bllokut, prandaj vetëm një numër shumë i vogël i dërgesave të saj preket nga tarifat e reja.