Industria përpunuese e mishit në Shqipëri paralajmëron rritje të ndjeshme të kostove dhe të çmimeve për konsumatorët, pas kufizimit të importeve nga Brazili për mishin e gjedhit dhe të shpendëve. Sipas përpunuesve, çmimet e mishit, të sallamit dhe të nënprodukteve të tjera mund të rriten deri në 40%.
Rreziku shtrihet edhe te mishi i derrit
Shqetësimi i sektorit nuk ndalet te dy kategoritë që janë prekur tashmë. Përpunuesit vlerësojnë se industria rrezikon të përballet edhe me kufizime për importin e mishit të derrit, çka do ta rëndonte më tej situatën e furnizimit me lëndë të parë.
Kërkesa për heqjen e tarifës doganore
Në mbrojtje të prodhimit vendas, përpunuesit kanë rikthyer kërkesën që tarifa doganore prej 10% për importet nga Bashkimi Europian të hiqet. Sipas tyre, kjo masë do të ndihmonte në zbutjen e efekteve të "izolimit" të tregtisë së mishit me Brazilin dhe në frenimin e rritjes së çmimeve.
Paralajmërimi i industrisë vjen në një kohë kur sektori po kërkon burime alternative furnizimi për të ruajtur nivelin e prodhimit dhe për të shmangur goditjen e drejtpërdrejtë mbi xhepin e konsumatorëve.
