Viti 2024 do të jetë mjaft specifik sa i përket huamarrjes Qeveritare për të financuar deficitin buxhetor, në një moment kur ajo i gëzohet një situate shumë të mirë të ardhurash dhe një deficiti buxhetor mjaft të ulët. Borxhi publik do merret në masë dërrmuese në tregun e brendshëm në formën e bonove të thesarit e obligacioneve, ndërkohë që huamarrja jashtë kufijve do zbresë në terren negativ. Ministria e Financave ka publikuar Planin Vjetor të Huamarrjes për vitin 2024, ku bie në sy orientimi i plotë i politikave të huamarrjes drejt tregut të Brendshëm.
Sipas Buxhetit 2024, deficiti buxhetor përllogaritet në rreth 61.28 mld lekë (2.5% e PBB), Huamarrja e brendshme pritet të financojë rreth 81.59% të deficitit (50 mld lekë), ndërkohë që pjesa tjetër e tij parashikohet të financohet nga gjendja e mbartur e likuiditetit në vitin 2023.
Totali i emetimeve pritet të jetë rreth 378.64 mld lekë gjatë vitit 2024, në rënie nga viti i shkuar, në fillim të të cilit Ministria e Financave parashikonte një total emetimesh prej 380.5 mld lekë përgjatë 2023.
Gjithashtu, ishte parashikuar që Huamarrja e brendshme të financonte rreth 45% të deficitit (25 mld lekë), nga 81% këtë vit.
Instrumenti me emetime më të shpeshta dhe me shumë më të lartë pritet të jetë bono thesari 12-mujore. Muajt me shumën më të lartë të maturimeve të borxhit shtetëror pritet të jenë Janar-Shkurt 2024 specifikisht me rreth 58.8 mld lekë dhe 59.4 mld lekë, ku maturimet më të larta i referohen dy instrumentave referencë: obligacione 3-vjeçare dhe 5-vjeçare (respektivisht 20.83 mld lekë dhe 18.73 mld lekë).
Në total huamarrja e huaj gjatë vitit 2024 vlerësohet të jetë rreth 36.6 miliardë lekë, apo afërisht 360 milionë euro, dhe duke konsideruar borxhin e huaj që ripaguhet gjatë vitit, huamarrja neto e huaj pritet të jetë në nivele negative prej (minus) 15.6 miliardë lekë. Gjithësesi, Ministria e Financave sqaron që në rast se kushtet e tregjeve gjatë vitit 2024 do të jenë të favorshme, nuk përjashtohet mundësia e avancimit në kohë me emetimin përgjatë vitit buxhetor 2024 të një Eurobondi të ri, i cili është parashikuar në vitin buxhetor 2025.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
