Aktiviteti ekonomik në Shqipëri u zgjerua me rreth 3.6 deri në 3.7% gjatë gjysmës së parë të vitit, ndërsa të dhënat paraprake sugjerojnë se ritmi pozitiv nuk u ndal as në tremujorin e tretë. Vlerësimi vjen nga Banka e Shqipërisë, e cila në Raportin e Politikës Monetare për tremujorin e katërt të vitit 2026 thekson se ekonomia ka ruajtur një rritje të qëndrueshme gjatë nëntë muajve të parë, por pasiguritë, si të brendshme ashtu edhe ndërkombëtare, janë shtuar.

Kërkesa e brendshme, motori i rritjes

Zëvendësdrejtorja e Politikës Monetare, Rajna Hoxholli, shpjegoi se zgjerimi është mbështetur kryesisht te konsumi privat, investimet dhe eksportet.

"Mbështetja kryesore në rritje ka ardhur nga kërkesa e brendshme, me konsumin privat, i cili ka përfituar nga rritja e punësimit dhe pagave, ndërkohë që rritja e investimeve është mbështetur ndër të tjera nga normat e ulëta të interesit dhe nga rritja e kreditimit. Ndërkohë kemi pasur një kontribut pozitiv dhe nga eksportet, këtë herë si nga shërbimet, eksportet e turizmit, ashtu edhe nga mallrat"

tha Hoxholli.

Inflacioni në rritje nga presionet e jashtme

Ecuria e çmimeve mbetet një nga pikat më shqetësuese për bankën qendrore. Inflacioni shënoi 3.2% në tremujorin e tretë dhe u përshpejtua më tej në 3.4% në tetor. Sipas Bankës së Shqipërisë, kjo prirje lidhet kryesisht me shtrenjtimin e mallrave të importuara dhe me shtimin e presioneve inflacioniste që vijnë nga jashtë. Në drejtim të kundërt ka vepruar ngadalësimi i rritjes së qirave.

Gjithsesi, banka qendrore vlerëson se presionet e brendshme mbi çmimet mbeten nën kontroll.

Qasje e kujdesshme në politikën monetare

Hoxholli e cilësoi qëndrimin e institucionit si të balancuar mes dy objektivave.

"Pra, në tërësi, qasja ka qenë një qasje e kujdesshme që ka balancuar si ruajtjen e stabilitetit të çmimeve, ashtu edhe mbështetjen e aktivitetit ekonomik, dhe mendoj që është një qasje që duhet të mbetet e tillë edhe në të ardhmen"

u shpreh ajo.

Pavarësisht performancës pozitive të ekonomisë, Banka e Shqipërisë paralajmëron se periudha në vijim do të kërkojë vëmendje më të madhe, sidomos për shkak të pasigurive dhe presioneve të importuara mbi çmimet.