Banka e Shqipërisë: Kreditë në lekë mbeten më të lira, interesat në euro për bizneset rriten

Huamarrja në lekë vazhdon të jetë më e favorshme për bizneset dhe individët, ndërsa kreditë në euro, sidomos ato për bizneset, po shtrenjtohen. Ky është përfundimi i raportit më të fundit të Bankës së Shqipërisë për politikën monetare, i cili tregon se diferenca mes kostos së financimit në të dy monedhat po ngushtohet gjithnjë e më shumë.

Bizneset: interes më i lartë për kreditë e mëdha

Sipas bankës qendrore, interesi mesatar për kreditë e bizneseve në lekë u ngjit në 6.5% në tremujorin e tretë të vitit, nga 6.3% që kishte qenë gjatë dy tremujorëve të parë. Gjithsesi, në krahasim me një vit më parë, norma rezulton rreth 0.2 pikë përqindje më e ulët.

Rritja ndihet më fort te kreditë e mëdha, me vlerë mbi 35 milionë lekë, ku norma mesatare shkoi në 7%, nga 6.1% në pjesën e parë të vitit. Për huatë më të vogla, interesat vijojnë të jenë më të ulëta.

Individët: hipotekat lirohen, kreditë konsumatore mbeten të shtrenjta

Për familjet, tabloja është më pozitive. Interesi mesatar për kreditë hipotekare në lekë ra në 3.7% në muajin e fundit, duke vazhduar zbritjen nga 3.9% që ishte në fillim të vitit. Nga ana tjetër, kreditë konsumatore mbeten më të kushtueshme, me një interes mesatar prej 9.1%, afër niveleve më të larta të dy viteve të fundit.

Euro shtrenjton financimin

Për kreditë në euro drejtuar bizneseve, interesi mesatar arriti në 6.4% në tremujorin e tretë, nga 6% në gjysmën e parë të vitit, në të njëjtin nivel me 6.4% të një viti më parë. Në segmentin e hipotekave në euro për individët, norma pati një ulje të lehtë, në 5.1%, nga 5.2%.

Si rezultat, diferenca mes interesit të kredive për bizneset në lekë dhe atyre në euro është vetëm 0.3 pikë përqindje, njësoj si një tremujor më parë, por dukshëm më e vogël se në periudhat e mëparshme.

Në përgjithësi, Banka e Shqipërisë vlerëson se normat e interesit për kreditë në lekë mbeten të ulëta, pavarësisht luhatjeve të tregut. Kjo vazhdon të sigurojë kushte lehtësuese financimi për ekonominë, ndërkohë që huamarrësit në euro, veçanërisht bizneset, përballen me kosto më të lartë.