Euro e ka hapur javën me një tjetër rënie ndaj lekut, duke shënuar nivelin më të ulët në histori. Kursi zyrtar i këmbimit i publikuar nga Banka e Shqipërisë e vendos monedhën europiane sot në 91.1 lekë, duke e afruar atë me kufirin e 91 lekëve. Me këtë nivel, rënia vjetore e kursit Euro-Lek është thelluar më tej dhe ka arritur në 6.1%.

Ofertë e lartë, kërkesë e dobët

Ekspertët e tregut valutor e shpjegojnë dobësimin e vazhdueshëm të euros me një disbalancë të qartë mes kërkesës dhe ofertës. Kërkesa për monedhën europiane mbetet e ulët, ndërkohë që oferta vijon të jetë e bollshme.

Përveç të ardhurave nga turizmi, të cilat tashmë qarkullojnë pothuajse përgjatë gjithë vitit dhe jo vetëm në sezonin veror, sasi të konsiderueshme euro po hyjnë në treg edhe përmes transaksioneve financiare automatike që kalojnë nëpër sistemin bankar. Këtu përfshihen blerjet me karta krediti në valutë, si dhe të ardhurat që vetë bankat sigurojnë nga interesat e instrumenteve financiarë në valutë të huaj.

Përmirësimi i Bilancit të Pagesave

Një pjesë e madhe e shpejtimit të rënies së euros këtë vit lidhet me përmirësimin e Bilancit të Pagesave, siç tregojnë statistikat. Në gjysmën e parë të vitit 2026, deficiti i llogarisë korrente u tkurr me gati 41% krahasuar me të njëjtën periudhë të një viti më parë. Ky është edhe niveli më i ulët i deficitit për një periudhë gjashtëmujore që nga viti 2018.

Ngushtimi i deficitit ka ardhur kryesisht falë rritjes së eksporteve të shërbimeve dhe remitancave. Në bilancin e përgjithshëm të pagesave po ndikon gjithashtu edhe rritja e investimeve të huaja direkte, të cilat në gjashtëmujorin e parë të 2026 arritën në 1.144 miliardë euro, me një rritje prej 50% në krahasim me të njëjtën periudhë të vitit të kaluar.

Suficiti fiskal pakëson lekun në treg

Një faktor shtesë që duket se ka forcuar monedhën kombëtare është suficiti i lartë fiskal, i cili ka ulur ofertën e lekut në treg. Gjatë tetë muajve të parë të vitit 2026, buxheti i shtetit rezultoi në suficit me 61.6 miliardë lekë, një vlerë 52% më e lartë se në të njëjtën periudhë një vit më parë.

Banka e Shqipërisë shton blerjet e valutës

Për t'iu përgjigjur presioneve në rritje mbi kursin e këmbimit, Banka e Shqipërisë i ka intensifikuar blerjet e valutës gjatë këtij viti. Të dhënat për ndërhyrjet në tregun e parasë tregojnë se në tremujorin e dytë banka qendrore bleu gjithsej 524 milionë euro, 224% më shumë se në të njëjtën periudhë të vitit të kaluar.

  • 143 milionë euro u blenë përmes ankandeve të programuara, me qëllim rritjen e rezervës valutore;
  • 381 milionë euro ishin blerje direkte, në funksion të objektivave të politikës monetare dhe stabilitetit financiar.

Nëse shtohen edhe 139.6 milionë euro të blera në ankandet e tremujorit të parë, totali i blerjeve për gjashtëmujorin e parë të 2026 arrin në 663.6 milionë euro.

Kjo dinamikë vijon tendencën e blerjeve të mëdha të valutës nga Banka e Shqipërisë që nisi në vitin 2024. Gjatë periudhës 2024-2025, vlera e blerjeve kaloi dy miliardë euro, ndërsa vetëm vitin e kaluar banka qendrore bleu në tregun e brendshëm 1 miliard e 27 milionë euro.

Pavarësisht këtyre ndërhyrjeve, faktorët strukturorë që ushqejnë ofertën e lartë të euros, nga turizmi dhe remitancat te investimet e huaja dhe suficiti buxhetor, vazhdojnë ta mbajnë kursin nën presion, duke e çuar monedhën europiane drejt niveleve gjithnjë e më të ulëta ndaj lekut.