OPEC uli parashikimet për rritjen e kërkesës globale për naftë për vitin 2022 për të pestën herë që nga muaji prill i këtij viti; gjithashtu uli shifrat e vitit të ardhshëm, duke përmendur sfidat ekonomike në rritje, inflacionin e lartë dhe rritjen e normave të interesit.
Kërkesa për naftë në vitin 2022 do të rritet me 2.55 milion milion fuci në ditë, ose 2.6%, u shpreh organizata e vendeve eksportuese të naftës (OPEC) në një raport mujor, që nënkupton 100 mijë fuci në ditë më pak në krahasim me parashikimin e mëparshëm.
Në raportin e OPEC thuhet se ekonomia botërore ka hyrë në një periudhë pasigurie të konsiderueshme dhe sfidash në rritje në tremujorin e katërt të vitit 2022. Më tej shkruhet se rreziqet negative përfshijnë inflacionin e lartë, shtrëngimin monetar nga bankat kryesore qendrore, nivelet e larta të borxhit sovran në shumë rajone, shtrëngimin e tregjeve të punës si dhe kufizimet e vazhdueshme të zinxhirit të furnizimit.
Ky është raporti i fundit përpara se OPEC dhe aleatët e tij, të njohur si Opec +, të takohen në 4 dhjetor për të vendosur rreth politikave që do të ndjekin. Grupi i cili kohët e fundit reduktoi objektivat e prodhimit, do të tregohet i kujdesshëm, sipas deklaratës së ministrit të energjisë së Arabisë Saudite.
Vitin e ardhshëm, Opec pret që kërkesa për naftë të rritet ne 2.24 milion fuci në ditë, gjithashtu 100 mijë fuci në ditë më pak se sa ishte parashikuar më parë.
Pavarësisht përfundimit për sfida në rritje, OPEC i la të qëndrueshme parashikimet për rritjen ekonomike globale për vitin 2022 dhe 2023, duke shtuar se ndërsa rreziqet ishin anuar drejt rënies, kishte gjithashtu një potencial pozitiv.
Në raportin e saj OPEC thekson se kjo mund të ndodhë si pasojë e një shumëllojshjmërie burimesh. Kryesisht, inflacioni mund të ndikohet pozitivisht nga cdo zgjidhje e situatës gjeopolitike në Europën lindore duke lejuar politika monetare më pak të ashpra. Nafta shënoi një rënie të cmimit pas publikimit të këtij raporti, duke u tregtuar me rreth 95 dollarë për fuci.
Për muajin tetor, me rënien e cmimeve të naftës nga frika e recesionit, grupi bëri një ulje me 100 mijë fuci në ditë në objektivat e prodhimit të OPEC +, me një ulje dhe më të madhe duke filluar nga muaji nëntor.
Raporti konfirmon se prodhimi i OPEC ra me 210 mijë fuci në ditë në muajin tetor, në 29.49 milion fuci në ditë, më shumë se ulja e premtuar nga OPEC +.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
