Qeveria ka parashikuar për vitin e ardhshëm një rritje prej vetëm 705 mijë lekësh, pak më shumë se 7 mijë euro, të buxhetit për emergjencat civile. Kjo vjen pavarësisht paralajmërimeve të Bankës Botërore se këtë vit Shqipëria rrezikon përmbytje edhe më të shumta.
Përmbytjet janë kthyer në një fenomen pothuajse të parashikueshëm për vendin. Çdo fund vjeshte dhe dimër, disa qindra hektarë tokë në veri ose në jug përfundojnë nën ujë. Mbetet e paqartë nëse një shtesë kaq e vogël mjafton për të përballuar zjarret, përmbytjet dhe fatkeqësitë e tjera natyrore që i kanosen vendit.
Shoqatat kërkojnë më shumë fonde
Përfaqësues të një shoqate e konsiderojnë rritjen të pamjaftueshme:
“Ne si shoqatë kemi kërkuar më shumë para pasi këto masa nuk mjaftojnë për të parandaluar përmbytjet.”
Edhe vështirësitë e bashkive janë të mëdha:
“Janë shumë bashki që nuk munden. Duhet një flotë mjetesh, të cilat bashkitë nuk i kanë. Duhen shumë para për t’i blerë ato. Ndaj në këto raste bashkitë të ndihmojnë njëra-tjetrën.”
Hidrovoret dhe kërkesa e Emergjencave Civile
Me fondet në dispozicion, Ministria e Financave vlerëson se rreth 80 për qind e hidrovoreve në vend do të ndërtohen ose rikonstruktohen, nga 75 për qind që është këtë vit.
“Është logjike. Ose puno, për të parandaluar ose do të paguash pasojat ndoshta edhe me kosto më të lartë.”
Ndërkohë, Drejtori i Përgjithshëm i Emergjencave Civile, Haki Çako, ka kërkuar që buxheti i institucionit që drejton për vitin e ardhshëm të jetë së paku 5.7 miliardë lekë.
