Furnizuesit e energjisë elektrike do të jenë të detyruar të korrigjojnë ose të përditësojnë të dhënat në Platformën e Krahasimit të Çmimeve brenda 72 orëve nga momenti kur konstatohen pasaktësi apo ndryshime. Ky detyrim përfshihet në projekt-rregulloren për funksionimin e platformës ekzistuese, të cilën Enti Rregullator i Energjisë (ERE) e ka hedhur për konsultim publik.
Platforma është tashmë funksionale, ndërsa detyrimi për publikimin e ofertave u vendos me vendime të ERE-s në vitet 2024 dhe 2025 për furnizuesit aktivë në tregun e lirë që shërbejnë familjet dhe bizneset. Rregullat e reja synojnë të sqarojnë më në detaj përgjegjësitë e furnizuesve, të dhënat që duhet të publikohen dhe metodën e krahasimit.
Çfarë duhet të shfaqet për çdo ofertë
Sipas dokumentit, informacioni duhet të dërgohet në platformë përpara se oferta të dalë në treg. Për secilën ofertë propozohet të publikohen:
- çmimi i energjisë;
- tarifat dhe taksat;
- kostot shtesë;
- kushtet e zbritjeve;
- tarifat e mundshme për përfundimin e kontratës.
Ofertat do të ndahen sipas llojit, me çmim fiks, të ndryshueshëm ose dinamik, ndërsa në paraqitjen standarde ato do të renditen nga çmimi më i ulët për njësi.
Llogaritja e shpenzimit vjetor
Platforma do të përllogarisë edhe shpenzimin vjetor të pritshëm, duke u bazuar në konsumin e përdoruesit dhe kostot që aplikohen. Kjo shifër do të ketë karakter orientues, pasi fatura reale mund të ndryshojë në varësi të konsumit dhe luhatjeve të çmimeve.
Platforma u mundëson bizneseve të krahasojnë në mënyrë transparente ofertat e furnizuesve, njësoj si krahasimi i paketave të internetit apo i tarifave telefonike, dhe më pas të zgjedhin kompaninë nga e cila duan të furnizohen me energji elektrike.
Aktualisht në treg operojnë 38 furnizues të licencuar, por vetëm një pjesë e tyre publikojnë oferta në platformë. Kjo krijon një pamje të pjesshme të konkurrencës, e cila pritet të zgjerohet në vijim.
