Familjet që kanë statusin e klientit në nevojë nuk do të mbeten pa energji elektrike për shkak të faturave të papaguara, pa iu dhënë më parë mundësia të nënshkruajnë një marrëveshje pagese që përputhet me aftësinë e tyre financiare. Kjo parashikohet në një projekt-rregullore të hartuar nga Enti Rregullator i Energjisë (ERE), e cila vendos kushtet për ndërprerjen e furnizimit për këtë kategori dhe masat për mbrojtjen e saj.
Kur nuk lejohet shkëputja
Sipas draftit, për sa kohë klienti i përmbahet marrëveshjes për shlyerjen e detyrimeve, furnizuesi nuk ka të drejtë të kërkojë shkëputjen e energjisë. Mbrojtja shtrihet edhe te familjet ku përdoren pajisje mjekësore për mbështetjen e jetës, të cilat funksionojnë me energji elektrike.
Për më tepër, energjia nuk do të ndërpritet gjatë periudhës kur shqyrtohet kërkesa për përfitimin e statusit të klientit në nevojë, me kusht që furnizuesi të jetë njoftuar për këtë proces.
Nga ana tjetër, ndërprerja mund të kërkohet në rastet kur klienti nuk zbaton planin e pagesës ose kur refuzon vazhdimisht mundësi të arsyeshme për të shlyer detyrimet.
Kuadri ligjor dhe regjistri që mungon
Statusi i klientit në nevojë rregullohet nga ligji “Për sektorin e energjisë elektrike”, ndërsa kriteret dhe procedurat për ta përfituar atë miratohen me vendim të Këshillit të Ministrave. Ligji kërkon që të vlerësohen të ardhurat e ulëta, konsumi i energjisë, mosha dhe karakteristikat e lidhjes elektrike. Familjet që marrin mbështetje financiare nga buxheti i shtetit janë të detyruara t’i përdorin këto fonde për pagesën e energjisë.
Megjithatë, regjistri i klientëve në nevojë ende nuk është krijuar, edhe pse ishte parashikuar që në ligjin e miratuar në vitin 2015. Ligji i ri “Për sektorin e energjisë elektrike”, i miratuar në qershor të këtij viti, përcakton që qeveria të miratojë kriteret dhe procedurat për përfitimin e statusit brenda 12 muajve nga hyrja e tij në fuqi, por nuk vendos një afat të veçantë për ngritjen e regjistrit.
