Bankat që operojnë në Shqipëri pritet të përballen me rregulla më të rrepta, pas publikimit për konsultim publik të projektligjit të ri mbi ushtrimin e veprimtarisë së institucioneve të kreditit dhe mbikëqyrjen e kujdesshme të tyre. Dokumenti synon të forcojë sigurinë financiare, të mbrojë kursimet e qytetarëve dhe të përafrojë kuadrin ligjor shqiptar me standardet e Bashkimit Europian.
Më shumë pushtet për Bankën Qendrore
Një nga ndryshimet kryesore është forcimi i rolit të Bankës së Shqipërisë në mbikëqyrjen e sistemit bankar. Institucioni do të ketë kompetenca më të gjera për të kontrolluar bankat, për të kryer inspektime dhe për të marrë masa ndaj atyre që shkelin rregullat financiare.
Kërkesa më të forta për kapital dhe likuiditet
Bankat do të detyrohen të mbajnë më shumë kapital rezervë dhe më shumë likuiditet, si dhe të hartojnë plane më të qarta për përballimin e krizave financiare. Qëllimi është parandalimi i problemeve që mund të vënë në rrezik kursimet e qytetarëve ose stabilitetin e ekonomisë.
Ndryshimet prekin edhe drejtuesit. Administratorët dhe aksionarët do t’u nënshtrohen kontrolleve më të forta për profesionalizmin dhe transparencën. Parashikohen gjithashtu rregulla më të detajuara për menaxhimin e rrezikut dhe raportimin e informacionit financiar.
Mbrojtja e klientëve dhe trajtimi i bankave në vështirësi
Bankat do të kenë detyrime më të qarta për informimin e qytetarëve, trajtimin e ankesave dhe ruajtjen e sekretit bankar. Projektligji përcakton edhe procedurat kur një bankë has vështirësi financiare, duke rregulluar mënyrat e likuidimit, mbrojtjen e depozitave dhe trajtimin e kreditorëve, me synim që ndikimi te qytetarët dhe ekonomia të jetë sa më i vogël.
Rreziqet moderne
Për herë të parë, dokumenti përfshin rreziqet që lidhen me teknologjinë, sulmet kibernetike dhe faktorët mjedisorë apo socialë, duke kërkuar që bankat të jenë më të përgatitura për sfidat e kohës.
