Guvernatori i Bankës së Shqipërisë, Gent Sejko, u ka dhënë garanci qytetarëve se depozitat e tyre në banka janë të sigurta, në një kohë kur ditët e fundit janë shoqëruar me tensione dhe me incidente ndaj disa bankomateve gjatë protestave.
Deklarata u bë gjatë një takimi me kryeministrin Edi Rama dhe me drejtues të sistemit bankar. Sejko theksoi se sistemi bankar dhe ai financiar në vend kanë vazhduar punën pa probleme, ndërsa bankat ruajnë nivele të mira kapitalizimi dhe likuiditeti.
„Pavarësisht tensionit dhe presionit në sistemin bankar dhe financiar, depozitat e qytetarëve janë të sigurta. Bankat janë të mirëkapitalizuara dhe kanë një likuiditet shumë të mirë”, u shpreh Sejko.
Vëmendje te pagesat dhe paraja fizike
Sipas guvernatorit, Banka e Shqipërisë ka mbajtur aktive të gjitha sistemet e veta operacionale. Fokus i veçantë i është kushtuar sistemit të pagesave dhe qarkullimit të parasë në kesh, me qëllim që qytetarët dhe bizneset të mos përballen me ndërprerje të shërbimeve.
Sejko nënvizoi se puna e pandërprerë e bankave është jetike për ekonominë, pasi nëpërmjet tyre kryhen pagesat, mbështetet veprimtaria e sipërmarrjeve dhe sigurohet qarkullimi i parasë. Ai paralajmëroi se çdo dëmtim i këtij sistemi do të kishte pasoja të drejtpërdrejta për qytetarët dhe bizneset, duke vështirësuar edhe veprimtaritë e përditshme ekonomike.
„Sistemi bankar është në funksion të qytetarëve dhe bizneseve. Cenimi i sistemit bankar dhe i sistemit financiar i dëmton drejtpërdrejt bizneset dhe qytetarët, si dhe krijon problematika që kanë të bëjnë me jetën e gjithkujt. Prandaj, ne duam që ky sistem dhe kjo industri të vijojnë pa ndërprerje operativitetin, sepse, në të kundërt, pasojat do të ishin negative”, përfundoi Sejko.
