Apartamentet që jepen me qira ditore përmes platformave online si “AirBnB” do të përballen me kontrolle më të shpeshta dhe do të përfshihen në taksim, me synimin për të ulur informalitetin dhe për të rritur të ardhurat në buxhetin e shtetit. Këtë e bëri të ditur Ministri i Financave, Petrit Malaj.
Sipas tij, po përdoren disa metoda për identifikimin e këtyre pronave dhe për trajtimin e tyre fiskal. Edhe kur apartamentet rezultojnë bosh, pronarët pritet të paguajnë supertaksën e pronës.
"Po aplikojmë disa metoda për AirBnB” dhe nëse apartamente, bosh do paguajnë taksen e pronës.”
Taksa e qarkullimit dhe e-vinjetat
Një tjetër temë e diskutuar ishte heqja e taksës së qarkullimit, si dhe mënyra se si është llogaritur rritja e saj vjetore. Të ardhurat nga kjo taksë vlerësohen aktualisht në rreth 38 milionë euro, ndërsa diferenca që krijohet në buxhet nga heqja e saj raportohet në rreth 50 milionë euro.
Për ta adresuar këtë problem, vitin e ardhshëm pritet të prezantohet modeli i e-vinjetave. Me këtë sistem synohet përmirësimi i mbledhjes së të ardhurave nga qarkullimi rrugor dhe rikuperimi i rreth 5 miliardë lekëve, të cilat, sipas deklarimeve, aktualisht mungojnë në arkën e shtetit.
Ministri Malaj nënvizoi se masat fiskale në tërësi kanë për qëllim krijimin e më shumë përfitimeve për shtresat në nevojë, zgjerimin e bazës së taksapaguesve dhe përmirësimin e administrimit të të ardhurave publike.
