Republika e Maldiveve ka arritur një marrëveshje me zhvilluesin e pasurive të paluajtshme, Dutch Docklands, dhe studion arkitekturore Waterstudio për të ndërtuar një qytet lundrues mjaftueshëm të madh sa mund të jetojnë 20,000 banorë. Ndryshe nga projektet e tjera që bëhen për hir të luksit, ky zhvillim shihet si një zgjidhje praktike për të luftuar rritjen e nivelit të detit.
Maldivet janë një arkipelag i përbërë nga shumë ishuj të ulët, 80 për qind e të cilëve janë më pak se një metër mbi nivelin e detit. Në skenarin më të keq, i gjithë vendi mund të përfundojë nën nivelin e detit deri në vitin 2100, për shkak të rritjes së nivelit.
Qyteti lundrues që po ndërtohet në Maldive është vetëm 10 minuta larg nga kryeqyteti me anije. Ai do të përbëhet nga rreth 5,000 shtëpi lundruese, restorante, shkolla dhe dyqane, të cilat do të ndërtohen në një kantier detar lokal dhe më pas do të montohen në vendet e tyre. Njësitë do të ankorohen në një byk nënujor për të mos i lejuar që të zhvendosen.
Shkëmbinjtë koralorë aty pranë do të shërbejnë si një pritës natyror i valëve të detit, për të minimizuar lëvizjen e qytetit lundrues që do të ndjehet nga banorët.
Qyteti do të jetë gjithashtu i vetë-mjaftueshëm, me pjesën më të madhe të energjisë elektrike që do të prodhohet nga dielli.
Ujërat e zeza do të trajtohen dhe do të ripërdoren si pleh për bimët. Në vend të ajrit të kondicionuar tradicional, ndërtesat dhe shtëpitë do të freskohen me ujë të ftohtë nga thellësitë e Oqeanit Indian.
Çmimi nuk është edhe aq i keq. Një studio fillon nga 150,000 dollarë, ndërsa një shtëpi familjare kushton afërsisht 250,000 dollarë.
Qyteti pritet të mirëpresë banorët e tij të parë në fillim të vitit 2024, ndërsa projekti pritet të përfundojë deri në vitin 2027.
