Qytetet në të gjithë Italinë janë në garë për të nisur skema të zgjuara që synojnë të joshin banorët e rinj për të ringjallur pasurinë e tyre vitet e fundit. Nga shtëpitë e rrënuara që shiten për pak më shumë se një dollar, te shtëpitë e gatshme për banim me çmime të ulëta, ka pasur një furi konkurrence.
Qyteti piktoresk i Presicce në rajonin me diell të Pulias është i fundit që hyn në lojë me një ofertë joshëse. Zyrtarët thonë se do t’u japin njerëzve deri në 30,000 euro për të blerë një banesë të zbrazët dhe për të marrë një vendbanim.
Edhe më mirë, shtëpitë në shitje si pjesë e marrëveshjes janë me çmim prej rreth 25,000 euro. Ashtu si pronat e tjera të lira në shitje në të gjithë Italinë, ato janë braktisur prej kohësh nga pronarët e tyre origjinal.
Dhe si një bonus shtesë, vendndodhja është e pabesueshme, e rrethuar nga natyra e zonës Salento në thembër të çizmes së Italisë dhe afër plazheve dhe ujërave të pastër bruz të Santa Maria di Leuca.
Autoritetet në Presicce shpresojnë se oferta e një stimulimi me para do t’i japë jetë të re qytetit të tyre të shpopulluar, ku të sapolindurit janë më të pakët çdo vit.
“Ka shumë shtëpi bosh në qendrën historike të ndërtuara para vitit 1991, të cilat ne do të donim t’i shihnim përsëri të gjalla me banorë të rinj,” tha këshilltari lokal Alfredo Palese. “Është për të ardhur keq të dëshmosh sesi lagjet tona të vjetra plot histori, arkitekturë dhe art të mrekullueshëm po zbrazen ngadalë”.
Detajet e marrëveshjes janë aktualisht duke u finalizuar, shton Palese, por autoritetet janë gati të nisin aplikimet në javët e ardhshme kur informacioni do të jetë i disponueshëm në faqen e internetit të bashkisë.
“Ne do të ofrojmë deri në 30,000 euro për njerëzit që dëshirojnë të lëvizin këtu dhe të blejnë një nga këto banesa të braktisura,” thotë ai. “Financimi i përgjithshëm do të ndahet në dysh: do të shkojë pjesërisht në blerjen e një shtëpie të vjetër dhe pjesërisht në rivendosjen e saj, nëse është e nevojshme.”
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
