Kristi Ceta/
Këtë vit, Turqia ka shënuar rritjen më të madhe të çmimeve ndër tregjet kryesore të turizmit në Mesdhe në lidhje me paketat e pushimeve, me çmime 49.5% më të larta në korrik.
Në të gjithë Evropën, rritja e këtij viti është vlerësuar në një mesatare prej 6.6% krahasuar me vitin e kaluar. Të dhënat vijnë nga Eurostat për “paketat e pushimeve” në Evropë, të cilat ofrojnë shërbime të shumta ose të gjitha të përfshira, duke nisur me ushqimin, akomodimin, udhëzuesit e kështu me radhë.
Për sa u përket tregjeve kryesore turistike në Mesdhe, rritja më e madhe regjistrohet në Turqi, me një rekord prej 49.5% për shkak të inflacionit.
Megjithatë, bregdeti turk mbetet shumë tërheqës për udhëtarët evropianë, të cilët këtë vit tregojnë një preferencë të veçantë për destinacione si Antalia, Dalamani dhe Bodrumi.
Nuk është rastësi që turizmi turk ka gjeneruar të ardhura prej 23.7 miliardë dollarësh në gjysmën e parë të këtij viti. Me një objektiv prej 60 miliardë dollarësh dhe 60 milion turistë këtë vit, vendi po shkon drejt një rekordi të ri.
Në Francë, e cila ishte në qendër të vëmendjes këtë vit për shkak të Olimpiadës, rritja e çmimeve ishte 22.2% krahasuar me korrikun e vitit 2023, në Itali +19.5% dhe në Qipro +16.7%.
Greqia fqinje u rendit në vendin e 11-të në BE për sa i përket shtrenjtimit të paketave, me 7.5%, pak mbi mesataren evropiane.
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
