Gjatë protestave të ditëve të fundit në Shqipëri janë dëmtuar 38 degë bankare dhe 42 bankomate, sipas bilancit zyrtar të bërë publik nga Ministrja e Ekonomisë dhe Inovacionit, Delina Ibrahimaj. Kjo është hera e parë që del një pasqyrë zyrtare e dëmeve në infrastrukturën bankare në të gjithë vendin, ndërkohë që protestat janë shoqëruar edhe me të lënduar si nga radhët e protestuesve, ashtu edhe nga forcat e rendit.

Sipas ministres, dëmtimet kanë cenuar ofrimin e shërbimeve të përditshme për qytetarët dhe bizneset. Shifrat japin një ide për shtrirjen e dëmeve në sektorin bankar, por ende nuk është përcaktuar vlera financiare e tyre, sa pika shërbimi mbeten jashtë funksionit dhe sa kohë do të duhet për rikthimin e plotë të aktivitetit.

Vetëm dy ditë më parë, Ibrahimaj kishte raportuar mbi 15 filiale bankare të dëmtuara, duke siguruar në të njëjtën kohë se depozitat e qytetarëve janë të sigurta dhe se sistemi bankar mbetet i qëndrueshëm.

Bankat me degë të reduktuara dhe orar të kufizuar

Shoqata Shqiptare e Bankave ka konfirmuar se situata e krijuar gjatë protestave ka prekur funksionimin normal të një pjese të rrjetit bankar. Për shkak të zhvillimeve në terren dhe nevojës për të mbrojtur klientët dhe punonjësit, shumë banka kanë punuar përkohësisht me më pak degë ose me orar të shkurtuar. Në disa raste, shërbimet nuk janë ofruar me kapacitetin dhe standardin e zakonshëm.

Shoqata u ka kërkuar klientëve mirëkuptim për vonesat dhe vështirësitë, duke sqaruar se veprimtaria e degëve do të vazhdojë në varësi të kushteve të sigurisë dhe vendimeve të secilës bankë.

Rekomandim për shërbimet digjitale

Për të shmangur lëvizjet e panevojshme, qytetarëve dhe bizneseve u rekomandohet që të ndjekin paraprakisht njoftimet zyrtare të bankave dhe, kur është e mundur, të përdorin kanalet digjitale për pagesat, transfertat dhe transaksionet e tjera.

Pavarësisht dëmeve dhe kufizimeve të përkohshme, Shoqata Shqiptare e Bankave nënvizon se pasojat e evidentuara janë materiale dhe se dëmtimi i ambienteve apo pajisjeve bankare nuk prek në vetvete depozitat e klientëve dhe funksionimin e sektorit bankar. Sipas saj, bankat vijojnë të zbatojnë masat për sigurinë, vazhdimësinë e aktivitetit dhe mbrojtjen e interesave të klientëve.