Kryeministri Edi Rama së bashku me ministren e Ekonomisë dhe Inovacionit, Delina Ibrahimaj, kanë prezantuar zyrtarisht platformën e re “Pasqyra e Çmimeve” dhe nismën e quajtur “KURSE”. Këto instrumente të reja synojnë t’u ofrojnë qytetarëve shqiptarë mundësi shtesë për të përballuar rritjen e kostove të jetesës dhe shportës së konsumit.

Sipas kryeministrit Edi Rama, kjo nismë vjen si rezultat i një bashkëpunimi konkret me pesë subjekte të rëndësishme të tregtisë ushqimore në vend. Kreu i qeverisë u shpreh se ky është vetëm hapi i parë i një procesi më të gjerë, me synimin për të përfshirë në të ardhmen sa më shumë subjekte të tjera, përfshirë bizneset e vogla dhe pikat e shitjes me pakicë.

Është fillimi i një procesi, ne duam të përfshijmë gjithnjë e më shumë subjekte, duke pasur parasysh edhe subjekte më të vogla, edhe pikat e shitjes së pakicë, të cilat janë pika ku siç e tha ministrja, shpeshherë çmimet lëvizin në mënyrë të paligjshme. Dhe ligji parashikon dhe gjobë nëse ato çmime janë spekulim.

Rama theksoi se aktualisht janë mbi 200 artikuj që bëjnë pjesë në këtë pasqyrë, ndërsa synimi i qeverisë është që deri në fund të vitit ky numër të kalojë mbi 1000 produkte, duke krijuar një situatë plotësisht të qartë për tregun. Ai shtoi se ndonëse ka pasur thirrje të vazhdueshme për të vendosur çmime tavan, ekzekutivi ka zgjedhur sistemin e bazuar te konkurrenca e lirë, ku çmimet përcaktohen nga tregu.

Nga ana e saj, ministrja e Ekonomisë dhe Inovacionit, Delina Ibrahimaj, shpjegoi detajet teknike të platformës dhe mënyrën se si qytetarët mund të përfitojnë prej saj. Ajo konfirmoi se pesë rrjete të njohura supermarketesh kanë rënë dakord të publikojnë çmimet e tyre në kohë reale.

Janë pesë rrjete supermarketesh të cilat kanë vendosur që të bëjnë transparente çmimet e tyre dhe të bëjnë publikimin e këtyre çmimeve në platformën “Pasqyra e Çmimeve”. Ne mendojmë që kjo është një nismë që do t'i shërbejë çdo qytetari, i cili nga telefoni, nga kompjuteri, mund të shohë dhe të verifikojë se cilat janë çmimet më të lira dhe të përzgjedhë se ku do ta bëjë pazarin e vet.

Ibrahimaj bëri me dije se janë përzgjedhur 13 kategori produktesh që përdoren më shpesh në shportën e përditshme të familjeve, ku përfshihen sheqeri, vaji, mielli, drithërat, makaronat, fasulet, thjerrëzat, kosi, vezët, gjalpi dhe pula. Për më tepër, është lançuar njëkohësisht edhe nisma “Kurse”, e cila sjell çmime të fiksuara për një numër të caktuar artikujsh.

Ne nga sot lançojmë nismën “Kurse”, e cila paraqet një numër produktesh që do të jenë me çmim të fiksuar deri më 12 janar të këtij viti. Janë gjithsej 212 produkte të cilat do të kenë çmimin e fiksuar, pra për të cilat çmimet nuk do të ndryshojnë.

Krahas pesë rrjeteve të mëdha të tregtisë me pakicë, në këtë angazhim janë përfshirë gjithashtu 22 furnitorë, të cilët janë zotuar t'i tregtojnë produktet përkatëse duke aplikuar marzhe fitimi minimale.