Qytetarët do të kenë mundësinë që të krahasojnë online dhe në kohë reale çmimet e mallrave në rrjete të ndryshme supermarketesh. Ekzekutivi ka prezantuar platformën zyrtare Pasqyra e Çmimeve, e cila tashmë është plotësisht funksionale në adresën e saj zyrtare online. Kjo nismë përfshin një total prej 238 artikujsh të ndarë në 13 kategori produktesh, të cilat monitorohen në 155 pika shitjeje në të gjithë vendin.
Sipas të dhënave zyrtare të bëra publike, platforma përfshin një gamë të gjerë mallrash që nga buka, sheqeri, vaji, makaronat, orizi, mishi i pulës, fasulet, e deri te produktet e bulmetit, frutat, perimet dhe detergjentët. Për produktet bazë, janë përcaktuar çmimet minimale fillestare ku sheqeri dhe ëmbëlsuesit nisin nga 65 lekë për kilogram, mielli dhe produktet e tij nga 70 lekë për kilogram, kurse orizi dhe drithërat fillojnë nga 75 lekë për kilogram. Makaronat tregtohen duke filluar nga 118 lekë, vaji dhe yndyrnat ushqimore nga 170 lekë, ndërsa qumështi fillon nga 119 lekë për litër.
Gjithashtu, në treguesit e tjerë bazë, kosi fillon nga 155 lekë për kilogram, vezët nga 189 lekë për 10 kokrra, gjurpi nga 525 lekë për kilogram, ndërsa mishi i pulës fillon nga 359 lekë për kilogram. Sa i takon prodhimeve bujqësore, frutat e freskëta nisin nga 89 lekë për kilogram dhe perimet e freskëta nga 159 lekë për kilogram.
Krahas kësaj platforme, pjesë e paketës është bërë edhe nisma e quajtur Kurse. Kjo masë parashikon uljen dhe mbajtjen të pandryshuar të çmimeve për 212 produkte ushqimore dhe të higjienës deri më datë 12 janar 2027. Produktet që shënojnë uljen më të madhe të çmimit në kuadër të këtij grupi janë kripa e jodizuar 500 gramë dhe vezët, të cilat do të shiten me një ulje prej 15 lekësh ose 40 për qind më lirë. Nga ana tjetër, produkti me uljen më të lehtë rezulton sheqeri, i cili për një periudhë prej tre muajsh do të kushtojë 69 lekë nga 70 lekë që ishte më parë.
Në segmente të tjera, orizi dhe makaronat shënojnë ulje çmimesh nga 4 për qind deri në 26 për qind, ndërsa artikujt e bulmetit paraqiten me ulje që variojnë nga 4 për qind deri në 25 për qind. Vaji i lulediellit dhe i ullirit regjistrojnë ulje prej 3 deri në 6 për qind. Për sa i përket sektorit të higjienës, platforma pasqyron çmime nga 27 për qind deri në 34 për qind më të lira për artikujt e shamponave dhe sapunëve të ndryshëm.
