Ministrja e Ekonomisë dhe Inovacionit, Delina Ibrahimaj, ka mbrojtur ndryshimet në TVSH që përmban projektbuxheti dhe paketa e re fiskale, duke theksuar se ulja e tatimit për produktet ushqimore ka për qëllim të lehtësojë barrën e shpenzimeve për konsumatorët dhe familjet shqiptare.
E ftuar në emisionin “Now” me Thimi Samarxhiun, Ibrahimaj shpjegoi se qeveria ka ndërthurur dy masa: një reduktim të ndjeshëm të TVSH-së për ushqimet dhe një rritje të vogël të normës së përgjithshme. “Ne synojmë që të lehtësojmë shpenzimet e konsumatorëve, të familjeve, duke lehtësuar TVSH-në e ushqimeve. Nga ana tjetër, bëmë një rritje të ulët, e cila në totalin e shpenzimeve të një familjeje shqiptare ka një ndikim shumë më të vogël sesa ulja e madhe që bëmë te ushqimet”, deklaroi ajo.
12,8 miliardë lekë më pak TVSH për shportën
Sipas ministres, në vlerë nominale, reduktimi i TVSH-së për çmimet e shportës arrin në 12,8 miliardë lekë. Ajo pranoi se rritja me 1 pikë përqindjeje prek një numër shumë më të madh produktesh, por argumentoi se të ardhurat që do të mblidhen prej saj në buxhetin e shtetit janë më të ulëta se shuma që nuk do të arkëtohet nga TVSH-ja e ushqimeve.
“Ajo që është më e rëndësishme është se ne kemi menduar për këtë mekanizëm rishpërndarjeje”, nënvizoi Ibrahimaj.
Përfitim më i madh për familjet me të ardhura të ulëta
Ministrja shpjegoi se ushqimet dhe pijet zënë rreth 39% të produkteve të shportës. Për këtë arsye, sipas saj, reduktimi prej 11,7 pikë përqindjeje i TVSH-së për to do t’u sjellë familjeve një përfitim më të madh sesa rritja e normës standarde me 1 pikë përqindjeje, nga 20% në 21%.
“Për familjet me të ardhura më të ulëta, ku pesha e ushqimeve është më e madhe sesa për një familje me të ardhura mesatare, ky ndikim do të jetë më i madh”, përfundoi Ibrahimaj.
