Një vit pas aplikimit të taksës mbi hirrën dhe kremin qumësht nga importi, qeveria bën “prapakthehu” dhe propozon heqjen e saj. Sipas relacionit që shoqëron projektligjin e depozituar në Kuvend, kjo politikë e ndjekur këtë vit ka dëmtuar prodhuesit vendas dhe ka sjellë të ardhura të papërfillshme në Buxhetin e Shtetit.
Sipas Donjaldo Hoxhës, i Shoqatës të Industrisë së përpunimit të Qumështit, “heqja e kësaj takse nuk ndikon te Industria e Përpunimit të Qumështit, sepse janë produkte që përdoren kryesisht nga sektorët e tjerë që bëjnë edhe eksport të produkteve që prodhojnë”.
![](https://wallstreet.al/ngarkuara/Qeveria-ben-prapakthehu-hiqet-akciza-mbi-hirren-dhe-kremin-qumesht.jpg)
Socialisti Erjon Brace pati propozuar një amendament për heqjen e TVSH-së për mëshqerrat barrsë të importit, i cili u mirëprit nga ekspertët e fushës, por u rrëzua nga kolegët e tij socialist.
Teksa shprehet e zhgënjyer nga paketa fiskale për vitin e ardhshëm, Industria e Përpunimit të Qumështit liston disa masa që duhet merren me emergjencë që blegtoria mos tkurret edhe më tej.
“Konkretisht kemi kërkuar subvencionim për litër për fermerët, përafrim me rajonin, heqjen e akcizës për gazin dhe një akcizë 6% në shitje për përpunimin e qumështit. Masa që do të ndihmonin, por asnjë nga këto kërkesa është marrë në konsideratë”, pohon për A2 CNN Donjaldo Hoxha.
![](https://wallstreet.al/ngarkuara/1669823704_258_Qeveria-ben-prapakthehu-hiqet-akciza-mbi-hirren-dhe-kremin-qumesht.jpg)
Për shkak të rënies së numrit të gjedhëve, shtrenjtimit të qumështit nga importi, kombinuar me rritjen e kostove të transportit, energjisë elektrike e gazit, krahasuar me një vit më pare, shqiptarët po paguajnë sot rreth 35 për qind më shumë për qumështin, 30% më tepër për kosin dhe ngjashëm për gjizën apo gjalpin.
Burimi: A2 CNN