Kryeministri Edi Rama ka udhëzuar anëtarët e kabinetit që t'u kërkojnë dorëheqjen të gjithë drejtorëve të institucioneve dhe agjencive që varen nga ministritë e tyre. Sipas njoftimeve në media, porosia iu përcoll ministrave sot, ndërkohë që vetë kreu i qeverisë ndodhej në Budva.
Pritet që kryeministri ta bëjë publik vendimin gjatë ditëve në vijim. Deri tani nuk janë dhënë shpjegime për arsyet që qëndrojnë pas kësaj kërkese, as për shtrirjen e ndryshimeve që synon qeveria.
Pikëpyetje mbi motivet
Mbetet e paqartë nëse lëvizja ka lidhje me protestat apo me ndonjë skenar të mundshëm zgjedhjesh të parakohshme.
Kërkesa për largime vjen pas kritikave që Rama i ka bërë administratës në paraqitjet e tij të fundit publike. Rreth një javë më parë, ai paralajmëroi masa ndaj drejtuesve që vonojnë përgjigjet ndaj qytetarëve dhe që nuk i zgjidhin brenda afateve problemet e ngritura prej tyre.
