Rekrutimi në administratën publike do të ndryshojë me planin e ri të qeverisë, i cili synon ta mbështesë punësimin në shtet mbi meritokracinë. Kryeministri Edi Rama bëri të ditur se të gjithë kandidatët do t’i nënshtrohen një testimi unik kombëtar, ndërsa do të krijohen një katalog i pozicioneve dhe kompetencave, një regjistër kombëtar talentesh dhe një sistem për vlerësimin e vazhdueshëm të cilësisë së drejtimit.

Sipas Ramës, kandidatët që e kalojnë provimin do të marrin një certifikatë, ndërsa në Regjistrin Kombëtar të Talenteve mund të regjistrohen të gjithë ata që duan të kontribuojnë për shtetin shqiptar.

Testimi sipas modelit të Kembrixhit

Kryeministri e lidhi reformën me krijimin e Ministrisë së Administratës Publike dhe shpjegoi se testimi do të realizohet në bashkëpunim me QSHA-në.

“Shkalla e meritës, si ta bëjmë administratën një hapësirë ku vendit më të aftë t’i shërbejnë vendit nga fronti i administratës, të hyjnë. Pjesë e kësaj reforme është krijimi i Ministrisë së Administratës Publike. Hyrja në administratë, rekrutimi do të bëhet përmes një testimi kombëtar. Do të bëhet në bashkëpunim më QSHA i cili po zbaton modelin e testimeve të Kembrixh. Nga provimi merr një certifikatë që është e vlefshme për 4 vite. Përparimi gjatë karrierës do të jetë në bazë të meritokracisë. Katalogu, regjistri kombëtar i talenteve. Të gjithë ata që duan të kontribuojnë për shtetin shqiptar do të regjistrojnë kandidaturën e tyre. Pastaj sipas fushës së tyre të dijes do të informohen në kohë reale për të gjitha mundësitë që krijohen”, tha Rama.

Një nga parimet e reformës është se drejtimi i institucionit nuk duhet të jetë një privilegj i shkëputur nga rezultatet.

Vlerësim për drejtuesit e institucioneve

Ministrja për Administratën Publike, Adea Pirdeni, njoftoi se do të nisë edhe vlerësimi i punës së drejtuesve të institucioneve, përmes një mekanizmi të jashtëm. Ajo tha se platforma puna.gov.al do të transformohet në një “portë të hapur” që do të jetë gati në dhjetor.

“Për secilën prej shkallëve të administratës po përgatitemi. Me sistemin kombëtar të testimit, kandidatët mund të testojnë njohuritë e tyre. Porta e hapur do të jetë gati në muajin dhjetor përmes transformimit të puna.gov.al. Katalogu kombëtar i pozicionit dhe kompetencave. Cilësia e drejtimit. Brenda këtij viti do të nisim një vlerësim të tërë përmes një mekanizmi të jashtëm, të vlerësojmë si drejtuesit tani marrin vendimet. Ecuria e shkallës së meritës do të pasqyrohet në Pasqyrë Albania”, tha Pirdeni.

Sipas Ramës dhe Pirdenit, përdorimi i inteligjencës artificiale do të shmangë ndërhyrjet në sistemin e provimit unik dhe do të rrisë transparencën e procesit.