Qeverisë shqiptare do t’i shtohet një institucion i ri, Ministria e Administratës Publike, me qëllim garantimin e standardeve më të larta të performancës për nëpunësit civilë. Kjo u bë e ditur nga kryeministri Edi Rama, i cili prezantoi gjithashtu reformën e re të quajtur “Shkalla e meritës”, e cila ka për qëllim që punësimet dhe ruajtja e pozicioneve të punës të bëhen bazuar vetëm te merita.
“Do krijojmë javën e ardhshme ministrinë e administratës publike sepse tema e administratës publike është temë shumë qendrore e punës së qeverisë, por është një temë shumë qendrore edhe shtet bërjes së mëtejshme europiane të Shqipërisë, dhe është nevoja që përmes kësaj ministrie të zgjerojmë gamën e detyrave, gamën e punëve dhe patjetër, gamën e ambicieve për të ngritur më lart shtetin europian të shqiptarëve dhe nuk diskutohet që këtë mund ta çojë përpara ministrja e shtetit për administratën publike”, deklaroi kryeministri Edi Rama.
Në kuadër të kësaj nisme, kreu i ekzekutivit sqaroi se do të ngrihet një katalog aktiv digjital, ku do të pasqyrohen nevojat e shtetit për profile të ndryshme profesionale dhe nivele përvojash.
“Katalog aktiv dixhital ku nga njëra anë do shihen të gjitha nevojat që ka shteti shqiptar për profesione dhe nivel eksperiencash dhe nga ana tjetër do të mund të futen të dhënat e kujtdo qoftë që dëshiron të njoftohet që në atë pozicion dhe për atë eksperiencë diku në Shqipëri hapet një vend pune. Mund të aplikojnë të gjithë ata që duan të bëhen pjesë e administratës”, tha kryeministri.
Në mbyllje, Rama nënvizuar se e gjithë struktura e reformës dhe “Shkalla e meritës” do të mbështeten përmes përdorimit të inteligjencës artificiale, me synim sigurimin e transparencës totale.
