Kryeministri Edi Rama u është përgjigjur kritikave që kanë shoqëruar Paketën Fiskale 2027 të propozuar nga qeveria, duke njoftuar se nesër ekzekutivi do të paraqesë dhe miratojë buxhetin e ri. Sipas tij, ky do të jetë buxheti i parë në historinë e vendit që tejkalon pragun prej 10 miliardë eurosh.
Në një status të publikuar në rrjetet sociale, Rama i quajti reagimet e shoqatave të bizneseve sulme të bazuara në "të vërteta të dalë gjysma-gjysma". Ai theksoi se qeveria do t'u përgjigjet me fakte konkrete, nëpërmjet paketës së re financiare.
“Flisni flisni për masat e reja fiskale, grijeni sallatën tuaj të urrejtjes dhe padijes me dokumenta pune të dalë gjysma-gjysma, se nesër e ka radhën qeveria të thotë fjalën e saj me miratimin e buxhetit të parë në histori që kalon pragun e 10 miliardë Eurove dhe paketës më ambicioze të rishpërndarjes së rritjes ekonomike”, shkroi Rama.
Çfarë pritet më tej
Me miratimin në mbledhjen e qeverisë të paketës fiskale dhe të projektbuxhetit 2027, pritet të bëhen publike edhe hollësitë se si do të zbatohen masat e reja në sektorët kryesorë të ekonomisë. Debati mes qeverisë dhe përfaqësuesve të biznesit mbetet i hapur deri në publikimin e dokumenteve përfundimtare.
