Qeveria ka premtuar rritje të pensioneve dhe dyfishim të shtesave për vitet që vijnë, por jo të gjithë pensionistët do të përfitojnë në të njëjtën masë. Shuma mujore që do t'i shtohet secilit do të varet nga kategoria e pensionit dhe nga vlera që ai merr aktualisht, ndërsa ata që i tejkalojnë pragjet e caktuara do të mbeten jashtë skemës. Kështu, premtimi për pensione më të larta merr një formë të diferencuar, me disa nivele dhe kushte, që e bën përfitimin real të ndryshëm nga njëri pensionist te tjetri.

Kryeministri Edi Rama e lidhi vendimin me ecurinë e ekonomisë dhe me rritjen e çmimeve.

“Ekonomia na e ka dhënë mundësinë, rritja e pensioneve të dyfishohet në çdo vit pasardhës. Rritja e këtij viti do të jetë e dyfishuar, e kam thënë për ata që e bënë madhështore protestën e Flamingos, jam i vetëdijshëm nga rritja e kostos së ushqimeve apo e naftës”

, deklaroi Rama.

Kush përfiton dhe sa

Skema parashikon shtesa të ndryshme sipas kategorive të pensionistëve:

  • 1,800 lekë në muaj do të marrin të moshuarit me pension pleqërie, nënat me shumë fëmijë dhe ata që e përfitojnë pensionin prej janarit, me kusht që pensioni i tyre të mos jetë më i lartë se 40 mijë lekë në muaj.
  • 800 lekë në muaj do të përfitojnë të moshuarit me pension pleqërie të pjesshëm, si dhe ata që marrin strehim social nën 22 mijë lekë në muaj. Kush merr mbi 22 mijë lekë në muaj përjashtohet.
  • 1,000 lekë në muaj do t'u shtohen pensionistëve në fshat, ish-kooperativistëve që marrin më pak se 18 mijë lekë në muaj. Ata që e kalojnë këtë shumë nuk përfitojnë rritje mujore.
  • 700 lekë në muaj do të marrin përfituesit e pensionit familjar me më pak se 18 mijë lekë në muaj, ndërsa ata mbi këtë nivel përjashtohen.
  • 600 lekë në muaj do të përfitojnë pensionistët e invaliditetit që marrin më pak se 30 mijë lekë në muaj. Kush merr mbi 30 mijë lekë nuk përfshihet në rritje.

Shpërndarja e përfituesve

Në total, bonusin mujor do ta marrin 727 mijë pensionistë, nga gati 770 mijë që janë gjithsej në vend. Megjithatë, shtesa maksimale prej 1,800 lekësh do t'u shkojë vetëm 36% të tyre. Pjesa më e madhe, rreth 41%, do të përfitojë 800 lekë në muaj, ndërsa 10.3% do të marrin 1,000 lekë. Përfituesit e mbetur do të kenë shtesa në vlerat 600 deri në 700 lekë në muaj.

Këto shifra tregojnë se, pavarësisht premtimit për dyfishimin e rritjes, ndikimi te të ardhurat e pensionistëve do të jetë i pabarabartë, në varësi të llojit të pensionit dhe të kufijve të përcaktuar nga qeveria.