Rreth 20 miliardë lekë, të barasvlershme me 220 milionë euro, do t'u shpërndahen pensionistëve në formën e një bonusi mujor duke nisur nga janari i vitit 2027. Shuma që qytetarët me pension do të marrin përmes këtij bonusi do të jetë dyfishi i asaj që përfitojnë gjatë vitit 2026.

Sa përfiton secila kategori

Masa e bonusit ndryshon sipas llojit të pensionit dhe nivelit të tij mujor:

  • 3,600 lekë në muaj për pensionistët që marrin aktualisht pension të plotë urban, me kusht që pensioni të mos kalojë 40,000 lekë në muaj.
  • 2,000 lekë në muaj për përfituesit e pensioneve të fshatit, pensioni i të cilëve nuk tejkalon 18 mijë lekë në muaj.
  • 1,600 lekë në muaj për pensionistët me pension të pjesshëm urban, që nuk e kalojnë pragun e 22 mijë lekëve në muaj.
  • 1,400 lekë në muaj për qytetarët që marrin pensione familjare, me një tavan prej 18 mijë lekësh në muaj.
  • 1,200 lekë në muaj për pensionistët e invaliditetit, të cilët nuk marrin më shumë se 30 mijë lekë në muaj.

Pensionistët që i tejkalojnë këto tavane nuk kanë të drejtë ta përfitojnë bonusin.

Indeksimi nis më herët

Krahas bonusit mujor, qeveria ka parashikuar edhe një fond prej 4 miliardë lekësh për indeksimin e pensioneve. Ky indeksim do të zbatohet nga muaji prill, pra tre muaj më herët se sa ishte planifikuar fillimisht.

Përmes këtyre masave synohet rritja e të ardhurave të pensionistëve dhe forcimi i mbështetjes financiare për kategoritë e ndryshme të tyre.