Nga nisja në muajin shkurt të procesit të rivlerësimit të pasurive të paluajtshme deri më sot, llogaritet rreth 84 mln euro shuma e kursyer nga individët dhe bizneset nga zbatimi i tatimit të reduktuar në 5%.
Të dhënat janë bërë publike nga administrata tatimore.
Nga procesi i rivlerësimit mund të përfitojnë si ata individë që kërkojnë të shesin një pasuri të paluajtshme, por edhe ata që pronat i kanë regjistruar me vlerë më të ulët se tregu.
Në të dyja rastet, tatimi i llogaritur (nga diferenca e vlerës së mëparshme të regjistruar të pronës dhe vlerës së re të shitjes apo tregut, tatimi që do të paguhet do të jetë 5% nga 15% që aplikohet në periudha të zakonshme.
“84 milionë euro të kursyera nga reduktimi i tarifave tatimore të pasurive të paluajtshme falë rivlerësimit! Individët dhe bizneset kanë përfituar nga procesi i rivlerësimit të pasurive të paluajtshme, duke ulur kostot fiskale dhe duke perfituar nga lehtësitë ligjore në fuqi.
Sipas administratës tatimore afati për kryerjen e rivlerësimit përfundon më 31 Dhjetor 2026.
“Koha për të përfituar vazhdon. Informohuni dhe shfrytëzoni këtë mundësi ligjore për të reflektuar vlerën reale të pronës suaj dhe për të përfituar nga lehtësitë e parashikuara në ligj”.
Nga 2 shkurti 2026 deri më 27 Prill 2026 sipas të dhënave të Agjencisë Shtetërore të Kadastrës, vënë në dispozicion për Monitor nga NAREA, në total kanë aplikuar 9,532 qytetarë.
Por deri tani tatimi 5% për rivlerësimin e pronave është paguar nga 22% e aplikuesve, apo në numër 2,114 e tyre. Totali i tatimit të paguar prej tyre dhe transferuar në tatime, sipas të dhënave llogaritet në vlerën e 1,59 mld lekëve.
53% e aplikimeve rezultojnë me tatim të papaguara (5,053 aplikime të përllogaritura nga ASHK por të papaguara).
25% e tyre apo 2,365 aplikimeve rezultojnë të refuzuara nga ASHK.
Numri i aplikimeve më së shumti është i përqendruar në Tiranë dhe Durrës.
42% e totalit të aplikimeve janë në Tiranë, 18% e tyre janë nga qytetet Durrës, Kavajë dhe Krujë. Aplikimet e qytetit të Vlorës përbëjnë 6%, në Lezhë është përqendruar 4.5% e tyre, në Sarandë 4%, në Fier 4% etj.
Rivlerësimi i apartamenteve me 5%, tatimet arkëtojnë për muajt shkurt-prill 16 mln euro të ardhura
Postimi ” Rivlerësimi i pasurive me taksë 5%, Tatimet: 84 mln euro kursime për qytetarët dhe bizneset ” eshte marre nga Revista Monitor.
