Çmimet më të larta të biletave për udhëtarët ajrorë në Europë janë “të pashmangshme” për shkak të kostos së lartë të karburantit të avionëve, sipas kreut të Shoqatës Ndërkombëtare të Transportit Ajror.
Edhe pse disa linja ajrore i kanë ulur së fundmi tarifat në Europë për shkak të kërkesës së dobët, Willie Walsh tha se kompanitë ajrore nuk mund t’i përballojnë këto kosto shtesë për një kohë të gjatë.
Ai tha BBC-së se në Mbretërinë e Bashkuar ka ende shqetësime se industria mund të përballet me mungesa karburanti gjatë verës, megjithëse këmbënguli se nuk ka vend për panik.
Megjithatë, ai theksoi se edhe nëse Ngushtica e Hormuzit do të rihapej nesër, ndikimi i ndërprerjeve të shkaktuara nga konflikti në Lindjen e Mesme mund të ndihej deri vitin e ardhshëm.
Një zëdhënës i qeverisë tha se linjat ajrore britanike kanë bërë të qartë se “aktualisht nuk po përballen me mungesë karburanti për avionë”.
Mbyllja e Ngushticës së Hormuzit si pasojë e konfliktit në Iran ka pasur ndikim të madh në çmimet e karburantit të avionëve dhe ka shtuar shqetësimet për mungesa të mundshme në muajt në vijim.
Europa, dhe veçanërisht Mbretëria e Bashkuar, zakonisht varen shumë nga importet nga ky rajon dhe po përpiqen të gjejnë furnizime alternative.
Javën e kaluar, për shembull, BE-ja tha se nuk kishte asnjë arsye rregullatore pse karburanti amerikan për avionë të mos përdorej nga linjat ajrore europiane, për sa kohë futja e tij në përdorim të menaxhohej me kujdes.
Të mërkurën, komisioneri i BE-së për energjinë, Dan Jørgensen, tha se nuk pret mungesë serioze në afat të shkurtër, por nuk mund të përjashtojë probleme furnizimi në afat më të gjatë.
Edhe drejtori ekzekutiv i operatorit turistik Tui, Sebastian Ebel, tha se nuk pret mungesa gjatë muajve në vijim.
Por Walsh tha se shqetësimet për operatorët britanikë mbeten.
“Mendoj se problemi kryesor me të cilin përballet Mbretëria e Bashkuar është koha,” shpjegoi ai. “Zakonisht pritet një rritje prej 25% e fluturimeve dhe e nevojave për karburant në muajt korrik dhe gusht, krahasuar, le të themi, me marsin.
“Mendoj se shqetësimi është se, nëse nuk sigurohen furnizime të mjaftueshme alternative, mund të ketë disa mungesa kur të hyjmë në periudhën e pikut veror.”
Megjithatë, ai theksoi se nuk ka arsye për panik dhe se anulimet masive të fluturimeve mund të shmangen.
Rritje të ndjeshme të çmimeve të biletave
Rritja e çmimeve të karburantit është reflektuar tashmë në koston e fluturimeve të gjata, disa prej të cilave kanë shënuar rritje të konsiderueshme.
Por sipas drejtuesve të linjave ajrore, disa tarifa në Europë në fakt kanë rënë, pasi kompanitë kanë ofruar ulje për të bindur udhëtarët hezitues të fluturojnë.
Megjithatë, Walsh këmbënguli se kjo situatë nuk do të zgjasë.
“Nuk ka asnjë mënyrë që linjat ajrore të përballojnë kostot shtesë me të cilat po përballen,” shpjegoi ai.
“Mund të ketë raste kur kompanitë ajrore bëjnë ulje për të nxitur trafikun e udhëtarëve… por me kalimin e kohës është e pashmangshme që çmimi i lartë i naftës të reflektohet në bileta më të shtrenjta.”
Ai shtoi se ndërprerjet në furnizimet me naftë bruto dhe dëmtimet në rafineritë e Gjirit nënkuptojnë se, edhe nëse Ngushtica e Hormuzit do të rihapej tani, çmimet e karburantit nuk pritet të ulen shpejt.
“Sido që ta shohësh, mendoj se kjo çështje do të vazhdojë edhe për disa muaj dhe mund të zgjasë deri vitin e ardhshëm,” tha ai.
Një zëdhënës i qeverisë shtoi se furnizuesit e karburantit mbajnë “rezerva karburanti për të mbështetur qëndrueshmërinë e tyre” dhe se qeveria po punon me industrinë e aviacionit për të mbajtur fluturimet në funksionim, si dhe po konsultohet për “masa që do t’i ndihmojnë linjat ajrore të planifikojnë orare realiste fluturimesh, për të shmangur ndërprerjet në minutën e fundit dhe për të mbrojtur pushimet”./ BBC
Postimi ” Rritja e çmimeve të biletave ajrore në Europë “e pashmangshme”, për shkak të luftës në Iran ” eshte marre nga Revista Monitor.
