Regjistrimet e bizneseve me pronësi tërësisht të huaj në vend kanë shënuar një ecuri pozitive gjatë periudhës janar–gusht 2026, duke regjistruar një rritje prej 35.2% krahasuar me të njëjtën periudhë të një viti më parë.
Sipas shifrave të bëra publike nga Qendra Kombëtare e Biznesit, gjatë tetë muajve të parë të këtij viti janë regjistruar gjithsej 1,644 subjekte me 100% kapital të huaj. Në harkun kohor të së njëjtës periudhë gjatë vitit 2025, numri i subjekteve të regjistruara ishte 1,216, çka tregon një shtesë absolute prej 428 biznesesh të reja.
Statistikat tregojnë gjithashtu se mesatarja mujore e regjistrimeve është rritur ndjeshëm, nga rreth 152 subjekte që ishte gjatë vitit të kaluar, në 206 subjekte për çdo muaj gjatë këtij viti.
Megjithatë, këto shifra pasqyrojnë vetëm dinamikën e regjistrimeve dhe nuk përkthehen automatikisht në një vlerë më të lartë investimesh. Të dhënat nuk ofrojnë detaje mbi kapitalin e investuar, dimensionin e aktivitetit ekonomik apo numrin e vendeve të punës që pritet të krijohen. Po ashtu, raportimet nuk përcaktojnë vendet e origjinës së investitorëve, sektorët ekonomikë ku po orientohen këto biznese, apo qarqet ku janë themeluar, duke u kufizuar vetëm te subjektet me 100% pronësi të huaj dhe duke lënë jashtë ato me kapital të përbashkët.
