Qendra Kombëtare e Biznesit (QKB) po përgatit një reformë që synon ta vendosë Shqipërinë ndër vendet me shërbimet më inovative të regjistrimit të bizneseve në rajon. Ndryshimet e parashikuara në projektligj përfshijnë modernizimin e procedurave, zgjerimin e shërbimeve digjitale dhe lidhjen e regjistrit shqiptar të bizneseve me sistemin europian, me qëllim lehtësimin e aktivitetit për kompanitë vendase dhe investitorët e huaj.
Ndërlidhja me BRIS brenda një viti
Dokumentacioni që shoqëron projektligjin parashikon që, brenda një viti nga miratimi i ndryshimeve, sistemi të jetë funksional për regjistrimet online dhe i lidhur me BRIS, platformën përmes së cilës regjistrat tregtarë të vendeve europiane shkëmbejnë informacion. Transformimi ka për qëllim ta kthejë QKB-në në një institucion që ofron shërbime më të shpejta, më transparente dhe në përputhje me standardet e Bashkimit Europian.
Për sipërmarrjet, kjo nënkupton më pak barrë administrative, ndërsa investitorët e huaj do të kenë mundësi të verifikojnë më lehtë të dhënat për kompanitë shqiptare.
Kosto më të ulëta për investitorët
Reforma pritet të ulë edhe shpenzimet, duke pakësuar nevojën për përkthime dhe noterizime të disa dokumenteve, gjë që i bën më pak të kushtueshme hapat për ata që duan të nisin aktivitet ekonomik në Shqipëri. Sipas vlerësimit të qeverisë, ndryshimet nuk do të sjellin kosto shtesë as për qytetarët, as për bizneset.
Ndikimi te noterët
Digjitalizimi pritet të prekë edhe tregun e shërbimeve noteriale. Disa procedura tradicionale mund të kërkohen më rrallë, por njëkohësisht për noterët mund të hapen mundësi të reja për shërbime online, përfshirë verifikimet përmes videokonferencave.
Objektivat afatgjata
Qeveria vlerëson se në periudhë më të gjatë reforma mund të nxisë regjistrimin e kompanive të reja, formalizimin e ekonomisë dhe rritjen e investimeve të huaja, sidomos nga diaspora dhe vendet e Bashkimit Europian. Synimi është që regjistrimi dhe verifikimi i bizneseve të mos varen më nga procedurat tradicionale administrative, por të kryhen përmes një infrastrukture digjitale të ndërlidhur me Europën, duke rritur konkurrueshmërinë e Shqipërisë në rajon.
