Tirana ka zënë vendin e dytë në listën e destinacioneve më të rezervuara nga turistët italianë dhe vendin e dhjetë te turistët gjermanë gjatë vitit 2026. Kryeqyteti shqiptar del gjithashtu ndër qytetet europiane me rritjen më të madhe të rezervimeve hoteliere, me +74%, sipas raportit “Year in Travel 2026” të agjencisë online të udhëtimeve eDreams ODIGEO.
Analiza mbështetet në kërkimet dhe rezervimet e udhëtimeve nga tregjet e Gjermanisë, Francës, Spanjës, Portugalisë, Italisë, Mbretërisë së Bashkuar dhe SHBA-së.
Renditja globale
Në nivel global, pesë destinacionet më të rezervuara gjatë vitit 2026 ishin Barcelona, Madridi, Parisi, Palma de Mallorca dhe Londra. Për sa u përket kërkimeve për udhëtime, në krye u renditën Parisi, Londra, Tokio, Nju Jorku dhe Bangkoku.
Rritje e fortë e rezervimeve hoteliere
Raporti përfshiu për herë të parë edhe të dhënat për rezervimet në hotele. Destinacionet më të preferuara në këtë segment ishin Barcelona, Madridi, Parisi, Roma dhe Amsterdami. Megjithatë, ritmet më të larta të rritjes u shënuan në qytete të tjera europiane: Cagliari në Itali (+78%), Dublini në Irlandë (+76%) dhe Tirana (+74%).
Sipas eDreams, udhëtarët po i kombinojnë gjithnjë e më shumë destinacionet klasike europiane me qytete që ofrojnë përvoja të reja kulturore.
Ku udhëtuan europianët në 2026
Dhjetë destinacionet më të rezervuara sipas shtetësisë së udhëtarëve:
- Francezët: Marrakesh, Barcelona, Lisbonë, Porto, Palma de Mallorca, Djerba, Madrid, Romë, Stamboll, Nice.
- Spanjollët: Madrid, Paris, Barcelona, Romë, Palma de Mallorca, Tenerife, Londër, Malaga, Sevilje, Gran Canaria.
- Portugezët: Paris, Barcelona, Madrid, Romë, Funchal, Londër, Amsterdam, Ponta Delgada, Gjenevë, Zyrih.
- Italianët: Barcelona, Tiranë, Paris, Katania, Madrid, Olbia, Amsterdam, Milano, Londër, Ibiza.
- Gjermanët: Palma de Mallorca, Barcelona, Stamboll, Londër, Vjenë, Madrid, Paris, Lisbonë, Athinë, Tiranë.
Te turistët italianë, Tirana renditet menjëherë pas Barcelonës dhe para Parisit, ndërsa te gjermanët mbyll listën e dhjetë destinacioneve kryesore, pas Athinës.
Destinacionet më të rezervuara për vitin 2027
Raporti jep edhe një pamje të rezervimeve të bëra tashmë për vitin e ardhshëm, ku Tirana nuk shfaqet në dhjetëshet kryesore të dy tregjeve:
- Italianët: Paris, Madrid, Londër, Barcelona, Sharm el-Sheikh, Amsterdam, Nju Jork, Budapest, Romë, Valencia.
- Gjermanët: Bangkok, Palma de Mallorca, Londër, Barcelona, Gran Canaria, Romë, Vjenë, Tenerife, Athinë, Lisbonë.
Të dhënat konfirmojnë rritjen e interesit të tregjeve kryesore europiane për Shqipërinë, veçanërisht të Italisë, e cila mbetet një nga burimet më të rëndësishme të turistëve për kryeqytetin.
