Operatorët e transportit publik në Tiranë do të rikthejnë në qarkullim flotën me kapacitet të plotë, pasi kanë rënë dakord me qeverinë për një subvencion tremujor për karburantin, duke tërhequr paralajmërimin për reduktimin e autobusëve.
Marrëveshja u arrit pas takimeve mes përfaqësuesve të shoqatave të transportit dhe institucioneve përgjegjëse, në një kohë kur rritja e çmimit të naftës kishte shtuar kostot e operatorëve.
Shoqatat e transportit urban dhe interurban kishin paralajmëruar se nga fillimi i shtatorit mund të reduktonin me 20-30% numrin e autobusëve në qarkullim, duke argumentuar se nuk mund të përballonin kostot e aktivitetit në nivelet aktuale të çmimit të karburantit.
Subvencioni i ri tremujor synon të mbulojë një pjesë të kostos së naftës dhe, sipas dakordësisë së arritur, operatorët do të vijojnë shërbimin me kapacitet të plotë.
Tensionet në sektor ishin shfaqur që gjatë gushtit. Shoqata Kombëtare e Transportit Qytetas u ishte drejtuar dy herë institucioneve me kërkesën për vijimin e kompensimit të karburantit, duke paralajmëruar se mungesa e mbështetjes financiare mund të sillte ulje të numrit të mjeteve dhe të frekuencës së linjave.
Operatorët argumentonin se karburanti përbën një nga zërat kryesorë të kostos së transportit publik dhe se rritja e çmimit të naftës po reflektohej drejtpërdrejt në shpenzimet e tyre, ndërkohë që tarifat e transportit kishin mbetur të pandryshuara.
Skema e mëparshme e miratuar nga qeveria parashikonte një kompensim prej 50 lekësh për litër karburant për konsumin e muajve mars, prill dhe maj 2026. Në gusht, operatorët kërkuan që mbështetja të zgjatej edhe për muajt qershor, korrik dhe gusht, si dhe për periudhën pasuese nëse çmimet e karburanteve mbeteshin të larta.
Në atë kohë, çmimi i naftës në tregun vendas kishte kaluar 210 lekë për litër, ndërsa shoqatat paralajmëronin se pa kompensim do të vihej në vështirësi ruajtja e kapaciteteve dhe frekuencave ekzistuese të transportit publik.
Me subvencionin tremujor të dakordësuar tashmë me qeverinë, operatorët kanë pranuar të vijojnë shërbimin pa reduktimin e paralajmëruar të flotës.
Postimi ” Transporti publik rikthehet me flotë të plotë, qeveria jep subvencion 3-mujor për naftën ” eshte marre nga Revista Monitor.
