Qeveria e Kosovës ka miratuar Programin për Mbrojtjen e Konsumatorëve të Cenueshëm të Energjisë Elektrike për vitet 2026–2027. Përmes këtij programi është planifikuar ndarja e rreth 15 milionë eurove për subvencionimin e faturave të energjisë elektrike për familjet në nevojë.
Iniciativa synon të ofrojë mbështetje financiare për shtresat që bëjnë pjesë në sistemin e mbrojtjes sociale, me qëllim lehtësimin e shpenzimeve për energjinë dhe sigurimin e qasjes së barabartë në këtë shërbim esencial. Sipas Ministrisë për Punë, Familje dhe Vlerat e Luftës Çlirimtare, në ditët në vijim pritet të nënshkruhet vendimi për përcaktimin e kushteve dhe kritereve që duhet të plotësojnë qytetarët për të përfituar nga kjo skemë.
Pas miratimit të vendimit do të hapet edhe thirrja për aplikim, ndërsa përfituesit do të përcaktohen bazuar në kriteret e vendosura nga institucionet përgjegjëse. Mbështetja do të realizohet përmes mbulimit të pjesshëm të faturave, duke u dhënë mundësi familjeve me të ardhura të ulëta që të përballojnë më lehtë kostot e energjisë.
Ky program përbën gjithashtu një nga detyrimet e Kosovës në kuadër të procesit të integrimit evropian dhe zbatimit të Planit të Rritjes për Ballkanin Perëndimor, i cili kërkon ngritjen e mekanizmave efikasë për identifikimin dhe mbështetjen e konsumatorëve të cenueshëm.
