Bashkimi Europian do të vërë në dispozicion 2.1 milionë euro për përgatitjen e projekteve dhe mbikëqyrjen e punimeve që synojnë rritjen e eficiencës energjetike në ndërtesat publike të katër bashkive: Berat, Shkodër, Korçë dhe Përmet. Nisma prek 50 ndërtesa të zgjedhura paraprakisht, ndër to kopshte, zyra administrative, biblioteka, si dhe qendra sociale e kulturore.

Procedura e prokurimit është hapur nga Ministria e Financave, me një vlerë të parashikuar prej 2.1 milionë eurosh pa TVSH. Fondet vijnë nga Bashkimi Europian përmes Instrumentit të Asistencës së Paraanëtarësimit (IPA III), në kuadër të programit “BE për Energjinë 2024–2027”. Njoftimi u publikua më 5 nëntor në portalin zyrtar të Komisionit Europian.

Çfarë përfshin kontrata

Objekti i kontratës është auditimi energjetik i 50 ndërtesave, hartimi i projekteve teknike të detajuara, përgatitja e dokumentacionit për lejet e ndërtimit, preventivave dhe dokumenteve të tenderit për punimet. Kompania fituese do të ketë gjithashtu përgjegjësinë e mbikëqyrjes së punimeve për eficiencën energjetike.

Ndërtesat do të vlerësohen dhe do të renditen sipas përparësisë, në përputhje me vendimin e Këshillit të Ministrave nr. 468/2024. Në përfundim të këtij procesi, për ndërhyrje do të përzgjidhen ndërtesa me një sipërfaqe të përgjithshme dyshemeje prej të paktën 22 mijë metrash katrorë.

Fondi i shpallur tani mbulon vetëm shërbimet e auditimit, projektimit, përgatitjes së dokumentacionit dhe mbikëqyrjes, por jo vetë punimet e ndërtimit. Ndërhyrjet fizike do të kryhen përmes një kontrate të veçantë punimesh, e cila do të dalë në tender pasi të përfundojë projektimi.

Afatet dhe fazat e zbatimit

Kontrata e shërbimit është ndarë në dy faza, të ndara nga një periudhë e ndërmjetme pa shërbime:

  • Faza e parë, 24 muaj, përfshin auditimet energjetike, projektimin teknik dhe përgatitjen e dokumenteve të tenderit për punimet.
  • Periudha e ndërmjetme, 12 muaj, gjatë së cilës pritet të zhvillohet prokurimi i kontratës së punimeve.
  • Faza e dytë, 36 muaj, përfshin mbikëqyrjen dhe monitorimin e ndërhyrjeve.

Në total, kontrata, bashkë me periudhën ndërmjetëse, zgjat 72 muaj.

Si do të zhvillohet tenderi

Procedura do të ndjekë formën e konkurrimit të kufizuar në dy faza, ku në fazën e dytë parashikohet të ftohen nga katër deri në tetë kandidatë. Ofertat do të vlerësohen 80% mbi bazën e cilësisë teknike dhe 20% mbi bazën e çmimit.

Kërkesat për pjesëmarrje mund të paraqiten deri më 22 dhjetor 2026, në orën 16:30, ndërsa fillimi i kontratës parashikohet për 29 tetor 2027.