Industria globale e bakrit ka nevojë për rreth 332 miliardë dollarë investime të reja në miniera, në mënyrë që të shmangë një mungesë të ndjeshme të metalit në tregun botëror. Kjo është përfundimi i një raporti të Bloomberg New Energy Finance (BNEF), të publikuar të martën, i cili paralajmëron se pa financime të mjaftueshme oferta nuk do të arrijë të ndjekë kërkesën gjithnjë në rritje, duke vënë në rrezik ritmin e elektrifikimit.

Sipas analizës, tregu i bakrit mund të kalojë në deficit që në vitin 2028, ndërsa kërkesa shtohet dhe prodhuesit e kanë të vështirë të zëvendësojnë rënien e prodhimit nga minierat ekzistuese. Deri në vitin 2050, mungesa e mundshme vlerësohet të arrijë në 20 milionë tonë metrikë.

Elektrifikimi nxit kërkesën

Bakri është shndërruar në një nga metalet kyçe të tranzicionit energjetik, kryesisht për shkak të përdorimit në automjetet elektrike, rrjetet e energjisë dhe infrastrukturën industriale. BNEF parashikon që kërkesa për bakër e lidhur me elektrifikimin do të rritet me 89%, duke arritur në 23.3 milionë tonë në vitin 2050, që përbën më shumë se gjysmën e konsumit total global.

Transporti elektrik pritet të jetë segmenti me rritjen më të shpejtë të përdorimit të bakrit. Makinat, kamionët dhe autobusët elektrikë e përdorin këtë metal në motorë, bateri, instalime elektrike dhe sisteme karikimi.

Oferta nuk mban ritmin

Nga ana tjetër, zgjerimi i kapaciteteve minerare po ecën më ngadalë se sa kërkohet. Pa investime të reja, prodhimi botëror mund të zbresë nga 30 milionë tonë në 2026 në 25.7 milionë tonë në 2050, një rënie prej 14.5%. Për më tepër, përqendrimi më i ulët i bakrit në mineralin e nxjerrë do të shtojë kostot e prodhimit, ndërkohë që riciklimi nuk pritet ta kompensojë plotësisht tkurrjen e prodhimit minerar.

Edhe në rast se sigurohen 332 miliardë dollarët e nevojshëm, deficiti mund të zgjasë të paktën deri në vitin 2043. Arsyeja është koha e gjatë e nevojshme për zhvillimin e minierave të reja, e cila mesatarisht arrin në 17 vjet.

Kili mbetet lider

Kili pritet të ruajë pozitën e prodhuesit më të madh të bakrit nga minierat, megjithëse prodhimi i tij parashikohet të bjerë nga 5.8 milionë tonë në 2026 në 4.8 milionë tonë në 2050. Pavarësisht kësaj rënieje, pesha e vendit në furnizimin global nga minierat pritet të rritet nga 24% në 28%, pasi prodhimi në rajonet e tjera do të tkurret me ritëm më të shpejtë.