Turqia ka në plan të investojë rreth 300 miliardë dollarë në tranzicionin energjetik deri në vitin 2040. Sipas qeverisë turke, elektrifikimi dhe efikasiteti i energjisë pritet të sjellin kursime kumulative prej 240 miliardë dollarësh. Planin e bëri të ditur Ministri i Energjisë dhe Burimeve Natyrore, Alparslan Bayraktar.
Sipas ministrit, për të përmbushur objektivat energjetike, vendi do të ketë nevojë për investime të mëdha, partneritete të qëndrueshme dhe teknologji inovative. Po aq e rëndësishme do të jetë edhe një klimë investimi e parashikueshme, që të mund të mobilizohet kapitali i nevojshëm.
Kapaciteti i instaluar pothuajse do të dyfishohet
Bayraktar deklaroi se Turqia synon ta çojë kapacitetin e përgjithshëm të instaluar të energjisë nga 128 gigavat në 281 gigavat deri në vitin 2040. Prej tyre, 175 gigavat do të vijnë nga energjia e erës dhe ajo diellore.
Megjithatë, ministri nënvizoi se shtimi i kapaciteteve prodhuese nuk mjafton. Sistemi energjetik ka nevojë edhe për më shumë fleksibilitet, për ruajtje të energjisë dhe për rrjete të ndërlidhura më të fuqishme.
“Kjo është arsyeja pse plani ynë përfshin 140 gigavat-orë kapacitet ruajtjeje të baterive dhe 15 gigavat kapacitet ndërlidhjeje të energjisë elektrike”, tha ai. “Këto investime do të na mundësojnë të integrojmë pjesë më të larta të energjisë së rinovueshme, të forcojmë qëndrueshmërinë e sistemit dhe të thellojmë bashkëpunimin rajonal në fushën e energjisë.”
Efikasiteti, shtyllë kyçe e strategjisë
Bayraktar e cilësoi efikasitetin e energjisë si një nga shtyllat kryesore të strategjisë energjetike turke. Ai kujtoi se Plani Kombëtar i Veprimit për Eficiencën e Energjisë synon të mobilizojë 20.2 miliardë dollarë gjatë periudhës 2024–2030.
"Së bashku me elektrifikimin, efikasiteti do të na sjellë 240 miliardë dollarë kursime kumulative deri në vitin 2040", theksoi ministri.
